Казаннааҕы кремльга, Юнеско Аан дойдутааҕы нэһилиэстибэтин эбийиэгэр, «Саха сирин баайа. Казань — 2025″ диэн көһө сылдьар быыстапка аһылынна. Экспозиция 2021 сылга илии баттаммыт Саха сирин бырабыыталыстыбатын уонна Татарстан өрөспүүбүлүкэтин бырабыыталыстыбатын икки ардыларыгар бииргэ үлэлээһин туһунан сөбүлэһиини олоххо киллэрии чэрчитинэн тэрилиннэ. Бу туһунан регион баһылыгын уонна бырабыыталыстыбатын пресс-сулууспата иһитиннэрэр.
Быыстапка икки өрөспүүбүлүкэ культурнай-гуманитарнай бииргэ үлэлээһинин салҕааһын буоллар. Кини Саха Сирин судаарыстыбаннай сыаннаһын харыстабылын фондаларыттан уонна Емельян Ярославскай аатынан Хотугу норуоттар историяларын уонна культураларын саха судаарыстыбаннай холбоһуктаах музейыттан 80-тан тахса ураты экспонаты билиһиннэрэр.
Тэрээһин сиэригэр-туомугар Саха сирин баһылыга Айсен Николаев, Татарстан өрөспүүбүлүкэтин премьер-миниистирэ Алексей Песошин, премьер-миниистири солбуйааччы — Татарстан өрөспүүбүлүкэтин бырамыысыланнаска уонна эргиэҥҥэ миниистирэ Олег Коробченко уонна Татарстан Өрөспүүбүлүкэтин культураҕа миниистирэ Ирада Аюпова кытыннылар.
Айсен Николаев эҕэрдэ тылыгар быыстапка Саха сирин уонна Татарстан культурнай сибээстэрин сайыннарыы чаҕылхай холобурунан буолбутун тоһоҕолоон бэлиэтээтэ.
«Бүгүн Казаҥҥа элбэх омуктаах норуоппут историятын, культуратын уонна дууһатын көрдөрөр ураты экспонаттары аҕалбыппыт. Саха сирин бэлиэлэрэ: сэдэх киэргэллэри, декоративнай-прикладной искусство айымньыларын уонна аатырбыт ааттаах алмааһы эһиэхэ билиһиннэрэрбитигэр үөрэбит. Экспонаттар ортолоругар АССР тэриллибитэ 100 сылыгар аналлаах таас ураты миэстэни ылар. Алмаас хаһан баҕарар күүһү, үйэлээҕи кэрэһилиир. Оттон бу ааттаах таас — Татарстан историятын уонна ситиһиилэрин, улуу Россия сайдыытыгар улахан кылаатын ытыктыыр ураты бэлиэбит», — диэтэ Саха сирин баһылыга.
Быыстапка айылҕа бөдөҥ алмаастарын, көмүс, платина, үрүҥ көмүс түөлбэлэрин эрэ буолбакка, саха ювелир-маастардарын, уҥуоҕу, тааһы кытта үлэлээччилэр айымньыларын кытта билиһиннэрэр. Экспонаттар ортолоругар Россия Геройдарын — анал байыаннай дьайыы кыттыылаахтара ааттаах алмаастар, ону тэҥэ саха сэдэх эгэлгэлэрэ: чароит, хромдиопсид уонна дианит бааллар.
Татарстан премьер-миниистирэ Алексей Песошин бырайыак культурнай атастаһыы саҥа саҕахтарын арыйарын бэлиэтээтэ уонна Саха сирин уонна Татарстан, географическай өттүнэн төһө да ыраахтарын иһин, аныгы технологиялары уонна инновациялары сайыннарыыга национальнай культураны харыстыыр дьулуурдаах буоларын тоһоҕолоон бэлиэтээтэ.
«Бу быыстапка — Татарстан олохтоохторугар уонна ыалдьыттарыгар Саха сирин дьикти эйгэтигэр уонна баай нэһилиэстибэтигэр таарыйарга, искусство кэрэ айымньыларын көрөргө бэртээхэй кыах. Ураты экспонаттар хотугу сир ахсаабат баайын, кэрэтин көрдөрөллөр, ону тэҥэ норуоттарбыт доҕордоһууларын бөҕөргөтөллөр», — диэн бэлиэтээтэ.
Үөрүүлээх сиэр-туом чэрчитинэн «Казанскай Кремль» музей-заповедник уонна Саха Сирин сыаннастарын судаарыстыбаннай харайыыларын икки ардыларыгар бииргэ үлэлээһин туһунан сөбүлэһиигэ эмиэ илии баттааһын буолла.
«Саха сирин баайа. Казань-2025» быыстапка ый устата үлэлиэҕэ.
This post was published on 28.08.2025 14:13 14:13