Таймылыыр олохтоохторо нэһилиэктэригэр кыайан тиийбэккэлэр Тиксиигэ хаайтарбыттара ыйтан орто. Санатан эттэххэ, балаҕан ыйыгар улуус нэһилиэктэригэр халлаанынан айан бөртөлүөт уматыга суох буолан тохтуу сылдьыбыта.
Таймылыыр олохтоохторо Таймылыырга бүтэһигин балаҕан ыйын 3 күнүгэр көппүттэр. Уматык кэлбит кэмиттэн бөртөлүөт Бороҕоҥҥо, Хара-Уулаахха, Күһүүргэ пассажирдары таспыт эбит буоллаҕына, чуолаан Таймылыырга күн-дьыл туруга мөлтөҕүттэн рейстар оҥоһуллубатахтар. Интернет ситиминэн көрдөххө нэһилиэккэ бу нэдиэлэни быһа туманнаах күннэр турууһулар диэн Тамылыыр дьаһалтатын баһылыгын солбуйааччы Елизавета Петрова сабаҕалыыр. Кини этэринэн, Тиксиигэ быһа холоон 60 киһи хаайтаран олорор, ол быыһыгар кыһыл оҕолоохтор, инбэлииттэр, пенсионердар, учууталлар бааллар.
Биллэн туран, Тиксиигэ сир халлаан икки ардыгар хаалбыт дьон айманар, бу кэм иһигэр харчылара да бүтэн, автобус проеһын да төлүүр кыахтара суох буолбуттарын төлөпүөн нөҥүө биллэрэллэр. Билигин нэһилиэккэ туох да көстүбэт туман турарын Елизавета Владимировна иһитиннэрэр.
— Омуннаабакка эттэххэ, хойуу туман саба бүрүйэн нэһилиэк иһигэр оннооҕор дьиэлэри нэһиилэ көрөбүт. Маннык өр кэмҥэ туманнырара өрүс тураары гыммытыттан буолуон сөп диэн сабаҕалыыбыт. Балаҕан ыйын бүтэһик күннэригэр бөртөлүөт “санрейс” оҥорон барбыта. Ону даҕаны күн-дьыл туругуттан сылтаан хас да хонук тардыллан баран кэлбитэ. Хаайтаран олорор дьоҥҥо биллэн турар ыарахан. Ол эрээри айылҕаны хайдах да гынар кыахпыт суох буоллаҕа, – диэн санаатын үллэстэр.
Улуус атын нэһилиэктэригэр халлаанынан сырыы оҥоһуллубут эбит буоллаҕына, чуолаан Таймылыырга рейстэр күн-дьыл туругуттан атахтаннылар. Бу күннэргэ “Тиксии бөһүөлэк” МТ, “Полярные авиалиниии”, Таймылыыр нэһилиэгин бэрэстэ-биитэллэрин кытта мустан сүбэ мунньах оҥордулар. Түмүккэ “Полярные авиалинии” үлэһиттэрэ улуустааҕы дьаһалта дьиэтигэр чопчу бөртөлүөт көтөрүн-көппөтүн биллэрэллэрин туһунан быһаарыныы ылыннылар.
— Оччоҕо биһиги дьон истиитигэр халтайга киирбэттэригэр сэрэтии үлэтин ыытыахтаахпыт. Ол эрээри бу суол кыайан туолбата уонна кыаллыбата. Күһүн уонна саас дьон айанныыра, биллэн турар, элбиир. Нэһилиэнньэ син биир сэрэтии үрдүнэн аэропортка киирэ турар, – диэн улуус баһылыгын бастакы солбуйааччы Денис Быдыгиев балаһыанньаны билиһиннэрэр.
Ааптар: Харысхан ПОПОВ
Хаартыска — Интернеттан