СӨ тыа хаһаайыстыбатын министиэристибэтэ 50 устуука «Ангара-1М» араадьыйа-ыстаансыйа ылла. Аҕыс оройуоҥҥа үлэлиир таба хаһаайыстыбаларыгар ананна. Билигин үһэ кэллэ, атына 2021 сыл саҥатыгар былааннанар, министиэристибэ пресс-сулууспата иһитиннэрэр.
Үлэ суһал боппуруостарын быһаарыыга анаммыт араадьыйа-ыстаансыйалары Алдан, Булуҥ, Дьааҥы, Муома, Нерюнгри, Томпо, Өймөкөөн уонна Усуйаана улуустарын таба хаһаайыстыбалара тутуохтара.
Тэрил тыйыс айылҕалаах усулуобуйаҕа туттулларга аналлаах. Эрэллээх төлөпүөн-телеграф сибээс 600 км тиийэ эргимтэни хабар кыахтаах. Эрэсиим быһыытынан үлэлиэҕэ, араас частоталаах буолуоҕа.
Тустаах эйгэ миниистирин солбуйааччыта Прокопий Николаев ыстаансыйаны оҥорон таһаарааччы «Егоршинский радиозавод» тэрилтэ кылаабынай конструкторын кытта көрүстэ. Кинилэр салгыы үлэлииргэ кэпсэттилэр, ол иһигэр араадьыйа-ыстаансыйа техническай хааччыллыытын усулуобуйатын дьүүллэстилэр. Томпо хаһаайыстыбатыгар тэрил бастакы холбооһунун көрдөрүөхтэрэ.
This post was published on 21.12.2020 10:01 10:01