Саха сирин табаны иитэр тэрилтэлэригэр хас сылын ахсын ыытыллар күһүҥҥү хараал саҕаланна. Хараал диэн эдемагеноз диэн таба ыарыытыттан сэрэтэр тэрээһин, ону тэҥэ, табалары ааҕыы уонна эдэрдэри бэлиэтээһин, суруйар edersaas.ru Тыа хаһаайыстыбатын пресс-сулууспатыгар сигэнэн.
Исписэлиистэр этэллэринэн, табалары үүрүү тэрээһинэ түмүктэммит. Табалар эт туппуттар, кыһыҥҥы мэччирэҥҥэ тахсыбыттар.
СӨ Тыатын хаһаайыстыбатын министиэристибэтин Хоту сир уонна балык хаһаайыстыбатын комплексын үгэс буолбут салааларын отделын салайааччыта Иннокентий Баланов эппитинэн, элбэх хаһаайыстыбаларга күһүҥҥү хараал буола турар, оттон Анаабыр улууһугар номнуо түмүктэммит.
Табаһыттар, бэтэринээрдэр муус тоҥорун, хаар халыҥыырын кэтэһэллэр.
Алтынньы 22 күнүгэр таба ахсаана бары хаһаайыстыбаларга 171 707 төбөҕө тиийдэ. Табаны иитии салаатыгар быйыл 106 хаһаайыстыба үлэлиир. Олорго 1295 киһи үлэлии-хамсыы сылдьар.
This post was published on 27.10.2020 14:02 14:02