Ил Түмэн уочараттаах XIV пленарнай мунньаҕын кэмигэр норуот дьокутааттара Таатта уонна Чурапчы улуустарын кыраныыссаларын чопчулуур уларыйыылары бастакы уонна бүтэһик ааҕыыга ылыннылар, суруйда Саха парламент саайт.
Таатта улууһун дьокутааттарын сэбиэтин бэрэссэдээтэлэ Петр Максимов быһаарбытынан, сокуон барыла Таатта уонна Чурапчы улуустарын 7 нэһилиэгин кыраныыссаларын уларытыыга туһуламмыт.
Былырыын ыам ыйын 23 күнүгэр Чурапчы, Таатта улуустарын дьокутааттара Ил Түмэни кытары саҥа кыраныыссаны чопчулаан сөбүлэһиннэрбиттэр. Ити уларыйыылар федеральнай уонна эрэгийиэннээҕи сокуоннар ирдэбиллэригэр сөп түбэһэллэр уонна кыраныыссаны ойуулааһын чопчуламмыт, картографическай матырыйааллар уонна эргиирдээх туочукалар каталогтара саҥардыллыбыт.
Максимов маны таһынан туох баар ирдэнэр сөбүлэһиллэр бороссодууралар уонна сири олохтооһун дьаһаллара, публичнай истиилэр ыытыллыбыттарын итиэннэ нэһилиэктэр дьокутааттарын Сэбиэттэрин быһаарыылара ылыллыбыттарын эттэ.
Сокуон барылын ырытыыга норуот дьокутаата Владимир Поскачин Таатта уонна Чурапчы кыраныыссалара туох биричиинэттэн уларытылларын уонна бу һлэни ыытыыга төһө бириэмэ барбытын туһунан чопчулуур ыйытыылары биэрдэ.
Парламент вице-спикерэ Юрий Николаев: “Айылҕа дьаалытынан өрүс фарватера уларыйар түгэнигэр өйдөспөт быһыы тахсыа суоҕа дуо? Холобур, Амыр уонна Уссури өрүстэргэ кыраныыссаны улырытыыга сөбүлэһии кэнниттэн, өрүс форватера уларыйан, сорох арыылар суох буолан хаалан, өйдөспөт быһыы тахса сылдьыбыттаах. 1991 сыллаахха Уссури өрүскэ баар Даманскай арыы Москубаҕа баттаммыт саҥа сөбүлэһии кэнниттэн Кытайга көспүтэ. 1915 сыллаахха диэри ити арыылар суохтара. Оттон өрүс сүнньэ уларыйан, ити арыы Арассыыйа өттүгэр кэлбитэ” диэн ыйытта.
Петр Максимов өссө 1965 сыллаахха Саха АССР Үрдүкү Сэбиэтэ оройуоннар саҥа административнай-территориальнай кыраныыссаларын бигэргэтэригэр, урукку Таатта улууһа Ытык Күөлгэ кииннээн Алексеевскай оройуон буолбут. Онтон 1990 сыллаахха төттөрү Таатта улууһа буолбут. Ол кэннэ улуустар ити ылыллыбыт быһаарыы кэннэ ЕГРН киллэриллибит сибидиэнньэлэринэн кыраныыссалара сөп түбэспэтэх, бырагыраамаҕа алҕас тахсан хаалбыт диэн эппиэт кэлбит. Ити алҕаһы ходуһаны туһанааччылар бэйэлэрин сирдэригэр ЕГРН уларытыылары киллэртэрээри, 2014 сыллаахха биирдэ булбуттар. Онтон ыла уон сыл ааспыт. Оттон территория мөккүөрүн туһунан эттэххэ, икки улуус кыттыһан сири оҥорор үлэлэри ыыппыттар, сөбүлэһиннэриилэр барбыттар. Онуоха ханнык да сири былдьаһыыга претензия биллэриллибэтэх, тоҕо диэтэххэ, хайа да өрүттэр территорияларын иэннэрин сүтэрбэтэхтэр.
