Аҕыйах сыллааҕыта Инстаграм лиэнтэтигэр дойдубут киинигэр Москваҕа олоро барбыт Таатта улууһун Уус Тааттатыттан төрүттээх кэпсии сылдьар, нууччалыы эттэххэ говорящай, араспаанньалаах бырааттыы Үчүгээйэптэр — Ючюгяевтар туһунан сырдатан ааспыппыт. Кинилэр дойду сулустарын кытта клип усталларын, биллиилээх дьону кытта бииргэ үлэлэһэллэрин, билсэллэрин ватсап ситимиттэн булан кэпсээн турардаахпыт. Аны билигин абыраллаах ватсаппыт сонунугар кыра быраат Саарын дойду саамай үрдүк хайатын Эльбрус чыпчаалыгар 5600 м үрдүккэ дабайбытын туһунан тилийэ көппүт сонуну үөрэ-көтө аахтыбыт, сэҥээрдибит, хаартыскалары көрөн дуоһуйдубут, астынныбыт.
Бу хайаҕа ыттарга мээнэ киһи санаммат даҕаны. Оннооҕор бэйэбит мырааннарбытыгар тахсарга үгүс көлөһүн тохтооччу. Онон элбэх бэлэмнэниини, тэрээһин үлэни көрсөн, доруобуйатын туругун тупсарынан, өй-санаа өттүнэн күүһүрэн, климатын учуоттаан, көрсүллэр ыарахаттары барытын тулуйан, альпинист сүгэ сылдьар тэриллэрин барытын баһылаан, сири-уоту ориентировкалыырга үөрэнэн баран тахсаллара чуолкай. Саарын доҕотторун кытта 5 буолан барбыттар, олортон иккиэ буолан инструктордаах дабайбыттар. Дьэ бу кыайыы, дьол! 4,5 тыһ. м таҕыстыҥ да салгын тиийбэт, тыын хаайтарар, былыттар усталлар, эмискэ дохсуннук хамсаммаккын диэбит ийэтигэр Саарын.
Альпинизм диэн хорсун дьон бэйэни тургутан көрүүлэрэ буоллаҕа. Хайа уонна үөһээттэн сиргин-дойдугун көрөр туохха да тэҥнэммэт кэрэ буоллаҕа. Онон даҕаны улуу Высоцкай «лучше гор могут быть только горы» диэн эттэҕэ.
А.Неустроева
Таатта
