Тыараһа нэһилиэгэр ураты үөрүүлээх күн буолла. Ол курдук Таатта эбэбитин туоруур САРМ тимир муоста Куула Тааттаҕа туоруурга анаан тутуллан үөрүүлээхтик аһылынна. Онон аны от оттуу барааччылар, булчуттар, сир астааччылар, сүөһү, сылгы көрдөөччүлэр, атын да кыһалҕалаахтар уруку дьылларга эбэбитин туоруурга көрсүбүт кыһалҕабыт толору быһаарылынна. Улаханнык үөрдүбүт астынныбыт.
Эбэбит уҥа биэрэгиттэн хаҥас кытылыгар үктэллэнэн Арассыыйа, Саха өрөспүүбүлүкэтин былаахтарынан уонна араас эгэлгэ дьүһүннээх салгын шардарынан киэргэтиллэн күөх кыраасканан сандаара субуруллан турар тимир муоста көрүөхтэн кэрэ көстүү.
Манна алгысчыт С.Ф. Кладкин дойдубут иччилэриттэн үйэлээх тутуу буоларын уонна дьонҥо сэргэҕэ муостабыт уһун сылларга туһалыы турарын туһугар диэн арыылаах сиэлинэн кэбиһэн, саха бастын астарынан тэптэриилээх саламаатынан, арыылаах алаадьынан айах тутан туран көрдөһөн алгыс эппитэ уонна алгысчыт кэнниттэн А. Н. Антонова муоста аһыллыытыгар анаан тойук туойбута кэлбит дьон дохсун ытыс таһыныыларынан доҕуһуолланна.
Е.П. Слепцов, Таатта хаһыат
