Бүгүн батсаап ситимин, «Таатта» баан моҥкуруут барар кутталга киирэн, сабыллыбыт, от ыйын 3 күнүгэр кэлбит дьон хатыылаах ааҥҥа кэтиллэ түспүттэр диэн сонун толордо.
«Сабыллыбатыбыт, уустуктар үөскээтилэр» — диэтилэр баан үлэһиттэрэ
Баан килийиэннэрэ этэллэринэн, бэрэстэбиитэллэр төлөпүөннээн, дьон харчытын устарыгар, счетун сабарыгар сүбэлээбиттэр. Ону таһынан, филиаллар сабыллан, Чепалов уулуссатыгар баар киин офис эрэ үлэлии турарын, 30 000 солк. улахан сууманы биэрбэттэрин туһунан суруйбуттар.
Бу иһитиннэрии төһө кырдьыгын билээри, «Таатта» бааҥҥа эрийэ сырыттыбыт даҕаны, биир да төлөпүөҥҥэ эппиэттээбэттэр. Ону хаста даҕаны төхтүрүйэн эрийэн, Москва куоракка баар офистарын кытта кэпсэтиигэ, баан бэрэстэбиитэлэ: «Аан дойду ситиминэн сымыйа сураҕы тарҕаталлар, баан сабыллыбатах, лицензията былдьамматах, өскөтүн оннук түгэн тахсар да түгэнигэр официальнай источникка, баан саайтыгар иһитиннэрэллэр. Онон, интэриниэккэ тугу суруйалларыгар барытыгар итэҕэйэн иһэр табыллыбат. Дьокуускайга техническэй саахал тахсан, баан үлэтэ уустугура сырытта. Чопчу иһитиннэриини баан клиеннэригэр эрэ биэрэбит», — диэн эттилэр.
This post was published on 03.07.2018 16:48 16:48