15 От ыйа 15.07
  • 17°
  • $ 87,74
  • 95,76

«Таатта» бааҥҥа нэһилиэнньэ 7 млрд. солк. үбү уурдарбыт

15:25, 05 июля 2018
Текст:
Читайте нас на
Яндекс Новости
ЯДВ

СӨ Бырабыыталыстыбатын бэрэссэдээтэлин бастакы солбуйааччытын э.т. Алексей Стручков «Таатта» коммерческай баан лицензиятын былдьаабыттарын кэннэ нэһилиэнньэ уурдарбыт харчытын хайдах ылыан сөбүн туһунан иһитиннэрдэ.


Бүгүн, от ыйын 5 күнүгэр «Таатта» баан лицензиятын РФ Киин баана тохтотон, үп-харчы тэрилтэтин салалтата өрөспүүбүлүкэ тас өртүгэр тахсан, быстах кэмҥэ үлэлиир дьаһалта ананна.

А. Стручков этэринэн, чааһынай дьон 5 млрд., юридическэй сирэйдэр, орто уонна дьоҕус бизнес бэрэстэбиитэллэрэ – 2 млрд. солк. уурдарыылаахтар. «Таатта» баан дьон уурдарыытын страховкалааһын ситимигэр киирэр. Лицензия былдьаныыта – страховой түгэҥҥэ киирэн, 1,4 мөл. солк. куоһарбат суумалаах  уурдарыллыбыт харчыны төттөрү биэриэхтэрэ. Сорох килийиэннэр бу этиллибит сууматтан үрдүк уурдарыылаахтар. Кинилэр быстах кэмҥэ үлэлиир дьаһалтаҕа сайабылыанньа суруйан киллэриэхтэрин наада, оччоҕуна тустаах реестр оҥоһуллан, уурдарыыны страховкалааһын судаарыстыбаннай корпорациятын ааҕыныстыбатын нөҥүө үбү төнүннэрии саҕаланыаҕа», — диэн эттэ кини.

1,4 мөл. солк. үөһэ сууманы уурдарбыт дьон харчытын тэрилтэ моҥкуруут барбытын кэнниттэн активтарын уонна хамсаабат баайын-дуолун атыылаабыттарын түмүгэр киирбит үптэн төнүннэриэхтэрэ. Онуоха тустаах кредитнэй тэрилтэ ананыаҕа.

Баан активтарын атыылаан баран ол харчытын уурдарыылаах дьоҥҥо, кредитортарга түҥэтиэхтэрэ эрээри, страховкаламмыт сууматтан үрдүк уурдарыы толору төннүө диэн билиҥҥитэ ким да мэктиэ биэрбэт.

«Таатта» баан салалтатын үлэтин бэрээдэги көрөр уорганнар уонна РФ Киин баана сыаналыахтара.

Марианна Тыртыкова, «Саха сирэ», edersaas.ru

Следите за самым важным и интересным в Telegram-канале и WhatsApp-группе ЯСИА