Бүтүн Арассыыйатааҕы библиотека күнүнэн Таатта улууһун Амма нэһилиэгэр «Библиотүүн» бэрт сэргэх тэрээһин буолла. Нэһилиэк олохтоохторо быыстапкаҕа, күрэхтэһиилэргэ, куонкурустарга көхтөөхтүк кытыннылар. Бу туһунан «Айылгы» СК дириэктэрэ Марианна Решетникова СИА-ҕа кэпсээтэ.
«Тэрээһин саҕаланыытыгар «Ахтыаҕыҥ ол ааспыт сыллары» диэн биир дойдулаахпыт, сэрии бэтэрээнэ, сытыы бөрүөлээх суруналыыс, «ССРС Булт хаһаайыстыбатын туйгуна» бэлиэ хаһаайына, алгысчыт, олоҥхоһут Михаил Соров төрөөбүтэ 100 сылыгар ананна. Михаил Герасимович үлэтин, олоҕун, суруйууларын туһунан дьоно-сэргэтэ сырдатта. Эдэр ыччаттар ытык киһи чаҕылхай олоҕо холобур буоларынан киэн туттан туран, кини айымньыларынан сыаҥкалары көрдөрдүлэр, ырыалары ыллаатылар, хоһооннору аахтылар. Салгыы «Сэбиэскэй кэми сэгэтэн» ретро-быыстапкаҕа мал-сал, таҥас-сап, оонньуур, кинигэ, сурунаал, значок арааһа тардыллыбыта болҕомтону тарта. Онтон урукку сыллар муодаларын көрдөрүү саҕаланыаҕыттан дохсун ытыс тыаһынан арыалланна. Бу киэһэ мустубут ыалдьыттар «У самовара» ретро-кафеҕа куруһубалаах, быысыбайдаах ыскаатарынан бүрүллүбүт остуолларга олорон сылабаартан итии чэй истилэр, 60-80-с сыллар иһиттэриттэн аһаан астыннылар, уруккуну-хойуккуну аҕыннылар», — диир Марианна Константиновна.
Киһини угуйар тэрээһин манан түмүктэммэтэх. «Оҕо сааһым оонньуулара» диэн хайысхаҕа умнулла быһыытыйбыт остуол оонньууларыгар күрэхтэһиигэ аҕам саастаахтар күннээбиттэр. Онтон Христина Богдокумова балачча суумалаах урукку харчылары көрдөрүүгэ аҕалбыта болҕомтону тардыбыт. Түһүлгэҕэ «Амма кылыһаҕа» диэн түөрт уонча сыллааҕыта тэриллибит ВИА (вокальнай-инструменатальнай ансамбль) кэнсиэриттэн, ол кэмнэрдээҕи нэһилиэк тэрээһиннэриттэн уһуллубут киинэлэр көрдөрүллүбүттэригэр нэһилиэк олохтоохторо бэйэлэрин көрөннөр үөрбүттэр. Салгыы сыана бэтэрээнэ Владимир Михайлов байааҥҥа доҕуһуоллааһынынан ырыа ыллаабыттар, пластинканан үҥкүүлээбиттэр. Умнуллубат киэһэни эдэрдэригэр элбэх бэстибээли, кэнсиэри салайбыт Мария Беркина, Елена Малышева иилээбиттэр-саҕалаабыттар. Тэрээһин үрдүк таһымнаахтык баран, нэһилиэк олохтоохторо улаханнык астыммыттар. Олохтоох бибилэтиэкэ үлэһитигэр, СӨ култуура туйгунугар Марина Малышеваҕа сэргэх тэрээһини көҕүлээбитигэр махтаммыттар.
