Соторутааҕыта П.А.Ойуунускай аатынан СӨ судаарыстыбаннай музейыгар үөрүүлээх күн тосхойбута. Бу күн музей иһинэн үлэлиир «Ситим» түмсүү икки сылы быһа илиилэрин араарбакка баайбыт сөрүөлэрин түмүктээн бэлэхтээтилэр.
Өбүгэ мындыр оҥоһугун илдьэ сылдьар, аҕам саастаах, 80-с хаарын санныгар түһэрбит, нэһилиэккэ өр сылларга тыа хаһаайыстыбатын салаатыгар үлэлээбит Татьяна Прокопьевна Гоголева сөрүөнү баайан үйэлээх сиргэ — музейга — туттарда.
Кинини арыаллаабыт «Ситим» түмсүү кыттыылаахтара сиэли утахтарынан арааран, бэлэмнээн сыралаах үлэни тэҥинэн оҥордулар.
Санатар буоллахха, бу түмсүү музей иһинэн үлэлээбитэ 10-с сылыгар барда. Бастакы сылларга Б.Ф.Неустроев-Мандар Уус туос ураһатын тутууга испэ, таспа туостары тигиигэ бэйэлэрин сэмэй кылааттарын киллэрбиттэрэ. Салайааччынан М.Е.Барахова үлэлээбитэ, кини кэнниттэн Н.М.Гоголева салайар, сүрүннээччи А.С.Борисова. «Ситимнэр» икки сылы быһа төгүрүччү олорон үлэлээн, сэһэн-сэппэн тэнитэн үлэ да курдурҕаччы барда.
Кэнчээри ыччакка кэпсиир, көрдөрөр оҥоһугу музей пуондатын үлэһитигэр Д.Ф.Кириллинаҕа туттаран, улахан биир үлэ сэһэнин түмүктээтилэр, диэн СИА-ҕа Тааттаттан музей исписэлииһэ Светлана Халгаева суруйда.
