Тааттатааҕы Былатыан Ойуунускай аатынан Судаарыстыбаннас музейын иһинэн үлэлиир «Ситим» сахалыы иис маастардара уонна туһааннаах үлэһиттэр сылгы сиэлинэн баайыллыбыт 12 угунньаны Ийэ дойдуларын көмүскүү барбыт биир дойдулаахтарбытыгар ис сүрэхтэн, этэҥҥэ эргиллэн кэлэллэригэр алгыы-алгыы сылаас тыыннаан баайан ыыттылар.
Бу сыл алтынньы 18 күнүгэр Былатыан Ойуунускай аатынан Судаарыстыбаннас музейыгар Октябрьскай нэһилиэк баһылыга А.П.Семеновтыын көрсүһүү ыытылынна.
Былыр былыргыттан сахалар этэрбэстэрин иһэ сиигирбэтин, томмотун диэн атахтарын харыстаан сылгы сиэлин угунньа оҥостоллоро. Сиэл угунньа сып сылаас, сиигирбэт буолан, эбиитин массаажтаан доруобуйаҕа үтүөнү эрэ дьайар. Саха булчут, сылгыһыт уолаттара баайыы угунньаны үчүгэйдик билэллэр. Бу күннэргэ нэһилиэкпит баһылыга А.П.Семенов Улуустааҕы норуот Айымньытын дьиэтин салайааччыта Г.Г.Вырдылини кытта Уссурийскай, Владивосток туһаайыытынан саха саллааттарыгар көмөнү оҥоро туруннулар. Улуус дьоно-сэргэтэ, тэрилтэтэ мобилизацияламмыт дьоммутугар тирэх буолан ким тугу кыайарынан көмө-ньыма буоллулар. Музей үлэһиттэрэ уонна «ситимнэр» угунньа баайан көмө оҥордубут.
Манна даҕатан бэлиэтээн аастахха, өрөспүүбүлүкэҕэ биллэр кыл сиэлинэн оҥорор маастар Л.Е.Богатырева салайар «Ситим» түмсүү музей иһинэн үлэлээбитэ балачча кэм буолла. Манна сүбэни-аманы музей специалиһа М.Е.Барахова оҥорор, тэҥҥэ үлэлэһэр.
Ааптар: Светлана Халгаева
