Таатта улууһугар история чахчыларын кэрэһиттэрэ буолан турар эбийиэктэри чөлүгэр түһэрэллэр, суруйда @taattagazeta.
Историческай эбийиэктэри чөлүгэр түһэриигэ улахан уопуттаах Дедюкин Юрий Семенович биригээдэтэ ыам ыйын 24 күнүттэн үлэни саҕалаата. Ол курдук бастакынан политсыылынай В.Г.Короленко дьиэтин өрөмүөннэнэр. Музейга сэргэ турар «Макар түүлэ» айымньы геройа Захар Цыкунов балаҕаныгар эмиэ сөргүтүү барар.
Үйэлээх бырайыак музей попечителэ, тутууну баһылаабыт Александр Ханин, Людмила уонна Айсен Николаевтар «Пааматынньыктары чөл хаалларыаҕыҥ» бачыымнарын чэрчитинэн ыытыллар. Таатта улууһун дьаһалтатын кытары дуогабарга олоҕурар үлэ Саха сирин историятыгар ураты суолталаах.
