Таатта улууһун норуот айымньытын дьиэтин иһинэн “Үйэлээх ситим” диэн бырайыак биллэрилиннэ. Дириэктэр Гаврил Вырдылин көҕүлээһининэн, бу күннэргэ И.С.Жараев аатынан Дьокуускайдааҕы СӨ норуоттарын аудиовизуальнай нэһилиэстибэтин национальнай киинэ онно үлэлээтэ. Киин исписэлииһэ Марина Винокурова саҥа тосхолго методическай көмөнү оҥордо.
Российскай Федерация президена В.В.Путин 2022 сылы Култуурунай нэһилиэстибэ сылынан биллэрбитэ. Өрөспүүбүлүкэ иһигэр араас хайысхалаах үлэлэр бара тураллар. Онтон Тааттатааҕы култуура управлениетын начаанньыгын солбуйааччы Р.Р.Петрова, фонда үлэһитэ К.С.Маркова норуот айымньытын дьиэтин иһинэн “Үйэлээх ситим” диэн бырайыагы биллэрдилэр. Семинарга 12 нэһилиэктэн сири кытта үлэлиир исписэлиистэр, Норуот айымньытын дьиэтин үлэһиттэрэ, кыраайы үөрэтээччилэр, бибилэтиэкэрдэр, олохтоох кыраайы үөрэтэр музей үлэһитэ М.А.Попова кыттыыны ыллылар. Семинары дириэктэр Г.Г. Вырдылин бэйэтэ салайан ыытта.
Сүрүн иһитиннэриини Чөркөөх кырдьаҕас олохтооҕо Гаврил Вырдылин-1 сирдэр ааттарыгар олоҕуран оҥордо. Ол курдук кини Чөркөөх нэһилиэгин 858 сир аатын урукку 1895, 1901, 1927 сылларга ыытыллыбыт биэрэпис докумуоннарыгар олоҕуран чуолкайдаан каартаҕа киллэрбит. Аныгы үйэ сиэринэн “SAS.планет”сыһыарыы нөҥүө сир исписэлиистэрин кытта үлэлээбит.
«Бастатан туран, улууска олорор кыраайы үөрэтээччилэр билиилэрин-көрүүлэрин камераҕа устан хаалларыы. Нэһилиэккэ баар сирдэр төрүт ааттарын быһааран электроннай каартаҕа киллэрии. Иис-уус, төрүт ас, туттар сэп-сэбиргэл, айар идэлээхтэр, дьыл кэмин билгэтэ, олоҥхону толоруу уо.д.а.
Бырайыак буоларын быһыытынан, күрэхтэһиигэ саамай элбэх, хааччыстыбалаах матырыйаалы киллэрбит киһиэхэ харчынан бириис туттарыллар. Устуу бары ирдэбилгэ эппиэттиир буолуохтаах, ол эбэтэр И.С.Жараев аатынан Дьокуускайдааҕы СӨ норуоттарын аудиовизуальнай нэһилиэстибэтин национальнай киинин бары ирдэбилигэр эппиэттиир докумуона толоруллуохтаах», — диэтэ семинар ыыппыт киин методиһа Марина Винокурова.
Кини салгыы эппитинэн, таатталар бырайыактарыттан ситимнээн атын улуустарга, нэһилиэктэргэ төрүт дьон олохторун, үлэлэрин, үгэстэрин көрдөрөр киинэ-видео докумуоннардаах архыып-пуондалар үлэлэрэ саҕаланыа.
