Соторутааҕыта Андрей Малахов Арассыыйа иккис ханаалыгар «Девочка Леопард» биэриитин көрдүм. Биир өттүнэн көрдөххө (Малахов үлэтэ буоларынан), ийэ кыһалҕатын шоуга кубулуппутуттан соһуйбаккын. Ол гынан баран, дьон кыһалҕата көргө-күлүүгэ кубулуйбута саныахха ыарахан.
«Леопард кыысчаан” ийэтэ Матрена Бырдаканова 26 сыл сүрэҕэр сыппах быһаҕынан аалар ыарыы оҥостон сырыттаҕа. Оҕотун, кыыһын хаалларар быһаарыыны ылынара саха дьахтарыгар аһара ыарахан кэм. Эмчиттэр: «Киһи буолара биллибэт. Кэлин дьон ортотугар кыайан сылдьыа суоҕа, эрэйи көрүө…», – диэбиттэр этэ.
Ол гынан баран, кини оҕотун кэтээн көрө сылдьыбыта. Матрена Уус Алдаҥҥа «Бастыҥ биэкэр» номинация хас да төгүллээх хаһаайката, Сыырдаахха ансаамбылга сылдьар, уопсастыбанньык бэрдэ. Олоҕор төһө да ыарахаттары көрүстэр, киһини куруук үөрэ-көтө көрсөр. Этэргэ дылы, күн киһитэ.
Матрена курдук ыарахан дьылҕалаах ийэлэр күн бүгүн элбэхтэр. Малахов биэриитин көрөн баран, кэккэ санааларга кэллим. Холобур, оҕо төрөтөр дьиэлэргэ психологтар наадалар. Тоҕо диэтэххэ, дьиэктээх, ситэ сайдыбатах оҕолор төрүүллэрэ кистэл буолбатах. Онуоха эдэр ийэ (эмиэ Матрена курдук) кыһалҕатын өйдүүр киһи көстөрө сэдэх. Сорох аҕалар маннык ыарахан кэмҥэ куотан хаалар түбэлтэлэрэ баар суол. Оччоҕо эдэр ийэ 9 ыйы быһа күүтэн-күүтэн кэлбит күндү кырачаанын кытары соҕотоҕун хаалар.
Ол тустаахха олус ыарахан. Маннык түгэҥҥэ ийэҕэ ким көмөлөһөр?
Харыстанара хараҕын уута эрэ буолар дуо? Барар сир баҕана үүтэ, кэлэр сир кэлии үүтэ буолар кэмигэр психолог көмөлөһөрө буоллар, итинник чиэски көстүүлэр суох буолуо этилэр.
