13 От ыйа 13.07
  • 24°
  • $ 87,74
  • 95,76

Төрүүр дьиэҕэ оҕолору атастаһыннарбыттар

18:00, 16 января 2017
Текст:
Читайте нас на
Яндекс Новости
ЯДВ

Кырдьык даҕаны, индийскэй киинэни да устуох курдук ис хоһоонноох түбэлтэ ааспыт үйэ 90-с сылларыгар Дьааҥы улууһугар  буолбут. Бу туһунан www.edersaas.ru сайт кэпсиир.


Чириковтар аҕалара күүтүүлээх кыыс оҕотун уонна кэргэнин ыла, Сайдыыттан улуус киинигэр Баатаҕайга, төрүүр дьиэҕэ кэлбит. Кинилэр  мааны кыыстарын кытта биир күн тэҥҥэ биэс оҕо күн сирин көрбүт. Онон биэс хонугунан бэһиэннэрин тэҥҥэ балыыһаттан таһаарбыттар. Эдэр ийэ таҥнар кэмигэр кыыстарын  аҕатыгар көтөхтөрөн кэбиспиттэр. Таһырдьа массыына күүтэн турар буолан, ийэлэрэ таҥнаатын кытта ыксалынан айаннаабыттар, аны пуортан сөмөлүөтүнэн  Сайдыыга көтүөхтээхтэр эбит. Бу түбэлтэ туһунан Чириковтар кыыстара Алена маннык кэпсиир:

-​ Пуорка тиийэн аҕам билиэт атыылаһар кэмигэр ийэм “Ийэ уонна оҕо” хоһугар киирбит. Оҕотун таҥаһын бэрийээри суорҕаны арыйбыта, кыыһын оннугар уол сытар эбит! Ийэм тута айманан, төрүүр дьиэҕэ төлөпүөннээн быһаарсыбыттар. Массыына булан, көтөөрү турар сөмөлүөтү тохтотон, төрүүр дьиэҕэ төттөрү айаннаабыттар. Аны таһырдьа -56 кыраадыс тымныы, туман бөҕөтө эбит. Көтөөрү турар сөмөлүөт биһигини күүтэн, чааһы быһа собуоттанан баран турбут. Хата, дьолго, били атастаһыннарбыт уолларын (дьиҥэ, онно мин сыттаҕым дии) аҕата ыла кэлэ илик эбит. Онон этэҥҥэ оҕолорун төттөрү атастаһыннарбыттар. Ол уоллуун кэлин Дьокуускайга устудьуоннуу кэлэн бараммыт билсибиппит, Семен Слепцов диэн ааттаах. Билигин убай, балыс диэн бэйэ-бэйэбитин истиҥник санаһабыт.

Маныаха майгынныыр түбэлтэни илэ харахпынан бэйэм көрөн турардаахпын. Икки сыллааҕыта дьүөгэм кыыс оҕоломмутун төрүүр дьиэттэн ыла барсыбыппыт. Кэтэһэр саалаҕа үс дьиэ кэргэн оҕолорун күүтэн олорор эбит. Акушерка дьахтар биир оҕону таһааран, эдэр аҕаны эҕэрдэлээн, уолун көтөхтөрөн кэбистэ. Үөрүү-көтүү, хаартыскаҕа түһүү кэнниттэн, эдэр ийэ оҕотун таҥаһын муодарҕыы көрөн, саҥа аллайда. Олох даҕаны атын ыал оҕотун ылбыттар эбит, аны төттөрү атастаһан иккистээн хаартыскаҕа түстүлэр. Биһиги оҕобутун кэтэһэ турар дьон, бу түбэлтэҕэ күлүөхпүтүн дуу, соһуйуохпутун дуу билбэккэ хааллыбыт…

Следите за самым важным и интересным в Telegram-канале и WhatsApp-группе ЯСИА