Олунньу 10 күнүгэр Дьокуускай куорат SMART-бибилэтиэкэтигэр төрөөбүт тыл уонна литэрэтиирэ дэкээдэтэ саҕаланна.
Бибилэтиэкэҕэ төрөөбүт тыл уонна литэрэтиирэ уобалаһыгар билиини бөҕөргөтөргө, тарҕатарга уонна харыстыырга аналлаах кэккэ тэрээһиннэр ыытыллыахтара.
Саҕалыыр тэрээһин кыттыылаахтара саха тылын үөрэҕин төрүттэрин билиини, чуолаан, лингвист Семен Новгородов алпабыытын бэрэбиэркэлиир куоҥкуруска кытыннылар. Итини сэргэ алын кылаас үөрэнээччилэригэр бибилэтиэкэ уруога буолан, бибилэтиэкэр Семен Новгородов олоҕун-дьаһаҕын, үлэтин-хамнаһын оҕолорго билиһиннэрдэ. Оҕолор кинигэ быыстапкаларын кытта билистилэр, саха тылын бэлиэлэрин көмөтүнэн тыллары оҥорууга күрэхтэһиигэ кытыннылар.
Бу күннэргэ SMART-бибилэтиэкэҕэ төрөөбүт тылларынан тылы, литэрэтиирэни тарҕатарга аналлаах араас тэрээһиннэр ыытыллыахтара. Бибилэтиэкэрдэр саха норуотун култуураларын, үгэстэрин чинчийээччилэр олохторугар, үлэлэригэр бибилэтиэкэ уруоктарын бэлэмнээтилэр, квест-оонньуулар, куоҥкурустар ыытыллыахтара.
Бээтинсэҕэ, олунньу 13 күнүгэр, бибилэтиэкэ ыалдьыттарын төрөөбүт тыл уонна литэрэтиирэ дэкээдэтин түмүктүүр тэрээһинэ күүтэр. Үөрүүлээх тэрээһин кэмигэр саха литэрэтиирэтин төрүттээччилэртэн биирдэстэрэ Николай Неустроевка анаммыт стенд аһыллыыта буолар. Санатан эттэххэ, кини аатын SMART-бибилэтиэкэ сүгэр. Итиэннэ ыалдьыттары бэлиэ күн саха тылынан саҥарар робот-бибилэтиэкэри кытта билсиһии күүтэр. Бу күн бибилэтиэкэ иһинэн төрөөбүт тылы үөрэтии киинэ арыллыаҕа.
