Ытык иэс уонна сиэр-майгы быһыытынан үлэлэригэр чахчы бэриниилээх дьон баар буолаллар. Сорох дьон кинилэри «фанатиктар, трудоголиктар» диэн ааттыыллар, атыттарга кинилэр үтүө холобур, идэтийбит, уһулуччулаах үлэһит буолаллар.
2025 сыл ыам ыйыгар үбүлүөйдээх күнүн ХИФУ уйулҕа үнүстүүтүн дириэктэрэ, уйулҕа үөрэҕин хандьыдаата, дассыан, МГПУ выпускнига, АБ үөрэҕирии эйгэтин туйгуна, 80-тан тахса билим үлэ ааптара – Аида Июньевна Егорова бэлиэтиир.
Бу бэлиэ күнүнэн эҕэрдэлээн туран, кини олоҕун кэрчик кэмнэрин санаан ааһыаҕы баҕарыллар: үгүс пединституту бүтэрээччилэр курдук, кини үлэтин суола уһуйааччы дуоһунаһыттан саҕаламмыта. Ол сылдьан хандьыдаат диссэртээссийэтин көмүскээбитэ, хаапыдыраны салайбыта, ол кэннэ уйулаҕа үнүстүүтүн дириэктэринэн талыллыбыта.
Бастаан көрдөххө, хайа баҕарар үрдүк үөрэх кыһатын уһуйааччытын олоҕун суола курдук. Ол эрэн, атыннаах.
Аида Июньевна социальнай уонна этническай уйулҕа хаапыдыратыгар сэбиэдиссэйдии олордоҕуна, кини салалтатынан үлэлии сылдьан, мин кини күннээҕи быыччык, быыстала суох уустук үлэтин куруук көрөрүм. Төһөлөөх элбэх устудьуон кини сэргэх лиэксийэлэрин, эксперименнии сэминээрдэрин, быраактыкалыы дьарыктарыгар үөрэммиттэрэ буолуой! Уйулҕа үрдүк үөрэҕин дьупулуомун ылбыт сүүһүнэн выпускник билим үлэтин салайбыта. Кытаанах ирдэбиллээх уһуйааччы эрээри, тус билсэргэ аламаҕай уонна көнө майгылаах киһи, уол оҕолоох, сиэн кыыһын иитэргэ көмөлөһөр.
Үрдүк үөрэх кыһатыгар орто идэтийбит үөрэхтэн кэлэммин, үнүбэрситиэт үлэтин ымпыгын-ымпыгын билбэт этим. Хаапыдырам сэбиэдиссэйэ миигин үлэлиир бырагырааммаларбын, электроннай учебниктары суруйарга, устудьуоннар куурустааҕы уонна дьупулуом үлэлэрин салайарга үөрэппитэ. Хас даҕаны үрдүк үөрэх учебнигын ааптара буолан, Аида Июньевна оччотооҕу дириэктэри, Оконешникова Анастасия Петровнаны кытта, биһиги хаапыдыраны успорт уйулҕатын учебнигын суруйарга күһэйбиттэрэ диэххэ сөп, ол үлэбит Москваҕа 2010 сыллаахха бэчээттэнэн тахсыбыта.
Мин Аида Июньевна билим чинчийиилэр матырыйаалларын хомуйар экспедициялары хайдах курдук тэрийэрин сөҕөр этим. Хаапыдыра уһуйааччылар Гонконга, Монголиҕа уонна атын дойдуларга дакылааттыы бараллара. Кини салалтатынан икки уһуйааччы социальнай уйулҕаҕа хандьыдаат билим диссэртээсийэтин көмүскээбиттэрэ. «Введение в этническую психологию», «Этническая психология», «Зарубежная социальная психология», «Словарь личностных качеств на тюркских языках сибирско-алтайской группы» — бу кини билим үлэлэрин быстар кыра аҥаара.
Ол эрэн, биһиги сэбиэдиссэйбит салайар чаҕылхай дьоҕура үнүстүүт дириэктэринэн анаммытыгар өссө күүскэ арыллыбыта. Уһуйааччы үлэтин кистэлэҥин эҥкилэ суох баһылыыр, үрдүк билиилээх исписэлиис, салайар тэрилтэтин сайдар тосхоллорун уратытык өйдүүр, кэллиэгэлэригэр ытыктанар, убаастанар салайааччы, Аида Июньевна үлэһит, таһаарыылаах, түргэн-тарҕан кэллэктииби үүннэрдэ.
Бастаан барааччыларга куруук уустук. Киниэхэ эмиэ уустук этэ уонна билигин да судургута суох дии саныыбын, 2022 сыллаахха хат биэс сылга эбии талыллыбыт дириэктэрбитигэр. Кини үлэтэ өссө таһаарыылаах, үтүө түмүктээх буолуо диэн эрэнэбин. Уйулҕа үнүстүүтэ үрдүк үөрэх бары соруктарын толоруо, тоҕо диэтэр кимнээҕэр эрэллээх, үөрэхтээх, идеалларыгар бэриниилээх салайааччылаах.
Аида Июньевна үлэтэ элбэхтэ биһирэммитэ – ХИФУ ректэрин, Ил Түмэн, Билим уонна идэтийбит үөрэхтээһин министиэристибэтин, оннооҕор «2010 сыллааҕы сааскы халаан ыксаллаах быһыытыгар көхтөөх көмөтүн иһин» диэн СӨ-тигэр Арассыыйа Ыксаллаах Быһыы-Майгы министиэристибэтин Бочуоттаах грамоталарынан наҕараадаламмыта.
Төрөөбүт күҥҥүнэн, күндү ытыктыыр Аида Июньевнабыт! Кытаанах, чэгиэн доруобуйаны, уһун-дьоллоох олоҕу, үлэҕэр үрдүк ситиһиилэри! Дьоллоох-соргулаах буол!
Уйулҕа үнүстүүтүн кэлэктиибин аатыттан
суруйда Платонова Зинаида Николаевна,
дассыан, уйулҕа билимин хандьыдаата.
