Ойуур баһаардарын умулуннарыыга өрөспүүбүлүкэтээҕи суһал ыстаап мунньаҕар Уус Алдан улууһун баһылыгын солбуйааччы Семен Бурнашев Түүлээх нэһилиэгэр умайар ойуур баһаара нэһилиэккэ ыкса чугаһаабытын иһитиннэрдэ. «Саамай кытыы дьиэҕэ 50 миэтэрэ кэллэ», — диэтэ кини. Бу туһунан https://www.instagram.com/p/CSGbQnOh_O2/ суруйар.
Билигин баһаарга уопсайа 136 киһи, 16 тиэхиникэ үлэлиир. Кылаайы нэһилиэгиттэн 128 киһи көһөрүллүбүт, ол иһигэр 76 оҕо Бээрийэҕэ, Тиит-Арыыга, Тандаҕа, Бороҕоҥҥо, Дьокуускайга ыытыллыбыттар.
Нэһилиэк, улуус, өрөспүүбүлүкэ суһал ыстааптара бииргэ сүбэлэһэн үлэлии олороллор. Нэһилиэккэ миэстэтигэр улуус баһылыга Алексей Федотов, улуус баһылыгын солбуйааччы Семен Бурнашев, үөрэх управлениетын начальнига Тарская И.М. үлэлииллэр.
Билигин Түүлээххэ оборона итиэннэ ЫБММ бөртөлүөттэрэ көттүлэр. Өрөспүүбүлүкэтээҕи суһал ыстааптан нэһилиэккэ туттар мал-сал, анал тэриллэр тиийдилэр. Эбии 56 киһи көмөҕө тиийдэ. Бүгүн Мэҥэ Хаҥалас улууһуттан уонна Тумул бөһүөлэгиттэн баһаарынай массыыналар көмөҕө тиийиэхтэрэ.
This post was published on 03.08.2021 16:24 16:24