Эрдэ ардахтар түһэннэр итиэннэ улахан тиэхэньикэлэр сылдьыбыт оллур-боллур суолларынан “Дьулуур” ХЭТ “Уаз”-фермер массыыналарынан айаннаатыбыт. Ардах уутуттан ыы-быччары гына туолбут дүөдэлэри салла көрө-көрөбүт туһааннаах сирбитигэр тиийдибит.
Киэҥ-нэлэмэн алаастардаах Түөйэ сирэ-уота, сыһыы муҥунан уойбут-топпут сүөһүлэр, сылгылара кэлбит эрэ дьон болҕомтотун тардыан тардаллар.
Тиийээппитин кытары, Николай Терютин салайааччылаах быыһааччылар, мустубут дьону сэттэ бөлөххө арааран, анал оҥоһуллубут квадраттары кэрийэ, Анастасия Алексеевна Монастыреваны көрдүүргэ туруннубут. Бэйэм, быыһааччы Арыйаан Слепцов салайааччылаах, 15 киһилээх 1-кы бөлөххө сылдьыстым.
Инньэ гынна бэҕэһээ о.э. от ыйын 30 күнүгэр уопсайа холбоон 99 киһи, ол иһигэр икки БПЛА, биир “МТЗ” тыраахтар, алта кыра массыына,биир квадроцикл, биир оптуобус, биир газель, биэс быыһааччы, үс Ис дьыала уорганын сотруднига, 91 волонтер сэттэ хайысханан алаастары, тыалары тараахтаан кэллибит.
Сарсыарда 10 чаастан саҕалаан, Түөйэттэн арҕаа сытар хас даҕаны алааһы кэрийдибит, ууга сытар сир элбэх, Кытаанах нэһилиэгин өттүнээҕилэр хайыы-үйэ оттоон алаастарын бүтэрбиттэр, сорох сирдэринэн отторо ньыраайы буолан быраҕыллыбыттар, Түөйэ өттүгэр охсубуттар, рулоннаабыттар.
Бэйэбит бөлөхпүт иһинээҕи дьону кытары билсэн “үтүө санаалаах, маладьыас даҕаны ыччат баар” диэн санаа үөскээтэ. Кинилэри кылгастык билиһиннэриэм.
Олег Сергучев, Арассыыйа устудьуоннарын этэрээттэрин Саха сиринээҕи салаатын салайааччыта: “Анастасия Алексеевна сүппүтүн 11 күнүгэр куйаар ситимин нөҥүө ааҕан бараммын ыллым да, хомуннум, 21 билэр киһибэр эрийдим уонна кэлбиппит. Бээтинсэҕэ диэри сылдьар былааннаахпыт. Миигин кытары Дьокуускайтан ол эрэн Кытаанахтан тардыылаах Илияна Толстоухова уонна Кэбээйиттэн Лилия Полятинская кэлсибиттэрэ. Куораттан кэлэрбитигэр Монастырева аймахтара Чурапчыга диэри такси булбуттара онтон манна кэлэрбитигэр ыллардахтара дии”.
Дьулустаан Константинов, Уус Алдантан сварщик идэлээх уол: “Маҥнай Бороҕоҥҥо киһи көрдөһө сылдьаммын, быыһааччылар кэлбиттэригэр истибитим. Онтон дьахтар сүппүтэ 11-с күнүгэр биллэрии кэлбитигэр, “баччааҥҥа диэри була иликтэр эбит дуу” диэн санаабытым. Ол кэннэ Түөйэҕэ барар эбиппин диэн быһаарыммытым. Төҥүлүгэ диэри таксиинан кэлбитим, онтон кэлэн иһэр дьон ылан ааспыттара. Түөйэҕэ уһуйаан баазатыгар түһэрбиттэрэ. Түмүктэниэр диэри сылдьар санаалаахпын”.
Дьэ ити курдук састааптаах хааман-сиимэн, көрөн-истэн, киэһэ 22 чааска диэри сырыттыбыт. Түөйэҕэ кэлэн истибиппит атын бөлөхтөр эмиэ тугу даҕаны булбатахтар, эппиккэ диэри “результат — ноль”.
Бэҕэһээ, Нерюнгри куораттан уонна Таатта улууһуттан эбии быыһааччылар кэлбиттэрэ дииллэр. Онон бүгүн эмиэ, 14-с күҥҥэ саҥа хайысханан, атын квардраттарынан көрдүү барар үлэни ыытыахтара.
Быыһааччылар олус кыһаллан, хас биирдии квадратнай миэтэрэни каартаҕа уруһуйдаан, былааннаах киэҥ үлэни оҥоро сылдьаллар. Билиҥҥи туругунан атын туох даҕаны саҥа версия суох курдук.
Ол эрэн бачча күннэр усталарыгар туох даҕаны суол-иис эбэтэр кэтэ сылдьыбыт таҥаһыттан эҥин фрагменнар көстүбэтэхтэрэ киһини толкуйдатар.
Ааптар: Сэмэн Жендринскэй. Ааптар хаартыскаҕа түһэриитэ
