М.К. Аммосов аатынан Хотугулуу-Илиҥҥи бэдэрээлинэй үнүбэрситиэт (ХИБҮ) Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүүтэ (АБ ХИНТуоКҮ) саха тылын уонна истилиистикэтин уонна нууччалыы-сахалыы тылбаас (СТИуоНСТ) хаапыдыратын 1 кууруһун маҕыстырааннара бэҕэһээ, кулун тутар 10 күнүгэр, “Билим чинчийиилэрин төрөөбүт тылынан сырдатар-иһитиннэрэр ситимҥэ тарҕатыы” диэн сэминээри тэрийэн ыыттылар.
Маҕыстыраан Полина Николаева билимҥэ салайааччыта, хаапыдыра дассыана, бэл.б.х. Саргылаана Владимировна Иванованы кытта билим ыстатыйаларын маассабай информация сириэстибэлэригэр бэчээттээһин билими киэҥ аудиторияҕа тарҕатыыга улахан оруоллааҕын бэлиэтээн эттилэр. “Билим чинчийиилэрэ үгүстүк идэлээх дьон эрэ туттуутунан, туһаныытынан хааччахтанар, оттон киэҥ араҥа билим саҥа арыйыыларын, ситиһиилэрин туһунан билбэккэ да хаалар. Ол эрээри аныгы СИС билими киэҥник тарҕатыыга уонна улахан суолталаах билим боппуруостарыгар уопсастыба болҕомтотун тардыыга ураты кыаҕы биэрэллэр”, — диэн эттэ маҕыстыраан Полина Николаева.
Сэминээргэ 2020 сыллаахха СИА-ҕа тахсыбыт “Билим” альманах туһунан кэпсээтилэр. Сахалыы тылынан билим өттүттэн интэриэһинэй чахчыларга олоҕурбут көрүүлэрдээх, дириҥ хорутуулаах чинчийиилэрдээх, киэҥ толкуйдатар ырытыылардаах тиийимтиэ тылынан суруйууларга дьон наадыйарын эттилэр. Онон быйылгыттан үнүстүүт саха тылын истилиистикэтин уонна нууччалыы-сахалыы тылбаас хаапыдырата уонна СИА, 2026 сылга Арассыыйа Бэдэрээссийэтигэр норуоттар сомоҕолоһууларын уонна Саха Өрөспүүбүлүкэтигэр култуура сылларынан, “Билим” альманаах иһинэн ТӨРҮТАС.САХАСИРЭ сыһыарыыны таһаарда. Бу бырайыак СИА сырдатар-иһитиннэрэр ситим билими кытта бииргэ үлэлээһинин биир үтүө уопута буолар.
Бу күн маассабай информация сириэстибэлэригэр (саайтка, хаһыакка, тэлэбиидэнньэҕэ, араадьыйаҕа, соцситимҥэ (билигин СИС быһыытынан ааҕыллар) чуолаан билим ыстатыйаларын бэчээттээһин суолтатын, кыһалҕаларын, туох-ханнык быһаарыылары ылыахха сөбүн туһунан кэпсээтилэр. Холобура, СИС билим ситиһиилэрин нэһилиэнньэ киэҥ араҥатыгар судургу тылынан тиэрдэр кыахтаахтара этилиннэ. Бу уопсастыба уопсай култууратын уонна билиитин үрдэтиигэ, анаарар толкуйу сайыннарыыга уонна аан дойдуга буола турар балаһыанньаҕа билим оруолун биир кэлимник көрдөрүүгэ төрүт буоларын бэлиэтээтилэр. “Онон, киһи, кини социальнай статуһуттан тутулуга суох, учуонайдар чинчийиилэрин хааччаҕа суох билсиэхтээх”, — диэн буолла.
«ТӨРҮТАС.САХАСИРЭ» сыһыарыыны толкуйдаабыт маҕыстырааннар кураатардара б.б.х., дассыан Акулина Александровна Васильева саха тылыгар билим истиилин сайдыытын туһунан дакылаатыгар: «Билим араас эйгэтин барытын саха сайаҕас тылынан кэпсиир кыаллар, оннук суруйуулар элбии туруохтаахтар. Билим уустук өйдөбүллэрин төрөөбүт тылбытынан быһаарартан толлор сатаммат, тылбыт сайдан иһиэхтээх», — диэн тоһоҕолоон бэлиэтээтэ.
Сэминээр иккис чааһыгар сыр (сыыр, туналык) астаныытын туһунан презентация көрдүбүт (хаартыскаларга быһа тардыы).
Саха литературатын хаапыдыратын дассыана, билэлиэгийэ билимин хандьыдаата Людмила Павловна Григорьева салайааччылаах литературнай үлэһит салаатын 5 кууруһун устудьуоннара уонна тылбаас салаатын үһүс кууруһун бакалаабырдара сэминээргэ кытыннылар. “Олус интэриэһинэй. “Билим” альманахха ыстатыйаларбытын таһаартарарга олус табыгастаах былаһаакка баар буолбут”, — диэн санааларын эттилэр.
