Таатта оройуонугар сылгы баазатыгар дьону ытыалааһыҥҥа уорбаланааччыны көрдүүллэр. Быһылаан түмүгэр биир киһи өллө, биир киһи балыыһаҕа киирдэ.
Саха сиринээҕи силиэстийэлиир кэмитиэт эппитинэн, быһылааҥҥа Туора-Күөл сэлиэнньэтин олохтооҕо, эрдэ киһиэхэ ыарахан эт-сиин эчэйиитин оҥорон сууттана сылдьыбыт, 51 саастаах Андрей Бояров уорбаланар.
«Силиэстийэ көрдөрбүтүнэн, 2024 сыл ыам ыйын 5 күнүгэр киэһэ Томтор сэлиэнньэтиттэн 20 км тэйиччи баар сылгы баазатыгар 51 саастаах эр киһи саанан дьону ытыалаабыт. Бааһырыытан 47 саастаах эр киһи миэстэтигэр өлбүт, 42 саастаах эр киһи илиитигэр уонна иһигэр эчэйиини ылбыт. Билигин киниэхэ медицина көмөтө оҥоһуллар. Быһылаан туһунан ол кэмҥэ баазаҕа баар, куотан саспыт киһи тыллабыр оҥорбут», — диэтилэр кэмитиэккэ.
Чурапчытааҕы силиэстийэ отделынан холуобунай дьыала тэрилиннэ. Силиэстийэ барар, көрдүүр үлэлэр ыытыллаллар.
Уорбаланааччы ханна баарын билэр дьон бу төлөпүөнүнэн биллэрэргитигэр көрдөһөллөр: 8(41151) 41104, 112, 02.
This post was published on 07.05.2024 15:29 15:29