Метаҥҥа биир оптуобус кэмчилээһинэ сылга 1,6 мөл.солк. кэриҥэ. Бу туһунан социальнай ситимнэргэ Саха сирин промышленноска уонна геологияҕа миниистирэ Максим Терещенко иһитиннэрдэ.
«Дьокуускай уулуссаларыгар күн аайы көрөр саҥа кыһыл оптуобустаргыт сылга 1 600 000 солкуобайы кэмчилииллэр. Хас биирдии оптуобус! Метан бэнсиинтэн, сэлээркэттэн үс төгүл чэпчэки», — диэтэ биэдэмистибэ баһылыга.
Кини этэринэн, 2022 сылтан Дьокуускай куорат иһигэр уонна куорат таһынааҕы линияларыгар 174 маннык экономическай оптуобус үлэҕэ киирбит. Үлэ «Олох инфраструктурата» национальнай бырайыагынан уонна Дьокуускайдааҕы маастар-былааны олоххо киллэрии чэрчитинэн барар.
Ил Түмэҥҥэ сыллааҕы туһаайыытыгар Ил Дархан Айсен Николаев бырабыыталыстыбаҕа гаас мотуордаах уматык ырыынагар үлэни күүһүрдэргэ сорудахтаата.
«Саха сирэ сайдыытынан 20 бастыҥ регионнарга киирэрин үрдүнэн, тэтимэ өссө да ситэтэ суох. Судаарыстыбаннай уонна муниципальнай тэрилтэлэр автопааркаларын гаас АЗС ситимнээх оройуоннарга метаҥҥа киэҥ далааһыннаах көһөрүүнү саҕалыыр соругу туруорабын», – диэн Айсен Николаев сорудахтаата.
Бүгүн Саха сиригэр 20 тыһыынча чэпчэки уонна таһаҕас массыыната гаас уматыкка көһөрүллүбүт. 2025 сыллаахха метаҥҥа 904 транспорт көспүт. Өрөспүүбүлүкэ 29 улууһугар 67 гаас заправката аһылынна. Саха сирин Минпромгеологията көрдөрөрүнэн, атмосфераҕа сиэрэ, бензол, углекислай гаас быраҕыллыыта 20 тыһыынча туоннанан аҕыйаабыт. Саха сирэ 2025 сыллаахха аан бастаан гаас уматык ырыынагын сайдыытын таһымынан дойду топ-20 иһигэр киирбитэ.
This post was published on 20.02.2026 11:12 11:12