Аҕа дойду Геройдарын күнүн көрсө «Россия» национальнай кииҥҥэ «Алдан» анал байыаннай дьайыы геройдарын туһунан патриотическай драма көрдөрүлүннэ. Ол туһунан телеграм-ханаалыгар Ил Дархан Айсен Николаев суруйда.
РФ бырабыыталыстыбатын бэрэссэдээтэлин солбуйааччы — Уһук Илиҥҥэ президент боломуочуйалааҕа Юрий Трутнев, Запорожскай уобалас губернатора Евгений Балицкай, Херсонскай уобалас губернатора Владимир Сальдо, Россия Геройдара, СВО кыттыылаахтара уонна дойду эдэркээн олохтоохторо көрөөччү буоллулар.
Быһаарбыттарынан, «Алдан» Россияҕа бастакынан тахсыбыт СВО туһунан регионнар ардыларынааҕы киинэ буолар. Запорожскай уобалаһы кытта уһуллуута кыттыгас.
«Бу бырайыак бииргэ үлэлээһин уонна регионнар холбоһууларын чаҕылхай холобура. Киинэ уһуллуутун Россия президенэ Владимир Путин өйөөбүтэ элбэҕи быһаарар», — диэтэ Ил Дархан.
Хаартыска Айсен Николаев телеграм-ханаалыттан ылылынна
«Киинэни сөбүлээтим. Бу байыастар тустарынан кэпсээн эрэ буолбатах, бу олох туһугар күүстэрин уонна олохторун анаабыттарга убаастабыл бэлиэтэ. Киинэ хартыынатын оҥорооччулар дьиҥнээх күүс сомоҕолоһууга уонна бэйэ-бэйэни өйөбүлгэ буоларын, үтүө уонна сиэрдээх буолуу туһугар ханнык баҕарар ыарахаттары бииргэ тутуһан туоруохха сөбүн сүрүн өйдөбүл быһыытынан көрдөрдүлэр», — диэтэ Айсен Николаев.
Кини эппитинэн, улахан экраҥҥа «Алдан» киинэ 2025 сыл олунньутугар тахсар.
