Ю. П.Степанов аатынан өрөспүүбүлүкэтээҕи инбэлииттэри кэлим реабилитациялыыр социальнай-чэбдигирдэр кииҥҥэ анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин кэлимник реабилитациялааһын салҕанар. Бу туһунан www.sakha.gov.ru саайт иһитиннэрэр.
«Биһиэхэ анал байыаннай дьайыы 513 кыттыылааҕа уонна кинилэр дьиэ кэргэттэрин 503 чилиэнэ кэлим реабилитацияны аастылар. Бу үлэ биһиги кииммитигэр Ил Дархан Айсен Николаев сорудаҕынан ыытыллар», — диэн тэрилтэ директора Асида Алексеева бэлиэтээтэ.
Кини иһитиннэриитинэн, тэрилтэҕэ байыаннай сулууспалаахтары уонна кинилэр дьиэ кэргэттэрин чилиэннэрин социальнай өйөбүл дьаһалларын туһунан иһитиннэрэр, сүбэлиир дьаһаллар эмиэ ыытыллаллар. Кииҥҥэ араас биэдэмистибэлэри уонна тэрилтэлэри кытта 84 көрсүһүү тэрилиннэ.
Ю. П.Степанов аатынан өрөспүүбүлүкэтээҕи инбэлииттэри кэлим реабилитациялыыр социальнай-чэбдигирдэр кииҥҥэ СВО кыттыылаахтарыгар уонна кинилэр дьиэ кэргэттэрин чилиэннэригэр доруобуйа туругун чөлүгэр түһэриигэ, эмоциональнай уонна мотивационнай эйгэлэри нуормалааһыҥҥа көмө оҥоһуллар. Социальнай-психологическай уонна социальнай-медицинскэй боппуруостарга улахан болҕомто ууруллар.
This post was published on 10.10.2025 10:12 10:12