«Защитники Отечества» пуонда Саха сиринээҕи филиалыгар «Бойобуой доҕордоһуу чаҕылхай туоһулара» («Там, где мы, там – победа!») кинигэ сүрэхтэннэ. Ол туһунан регион салалтатын пресс-сулууспата суруйда.
Кинигэ ДНР Россия Геройа (өлбүтүн кэннэ), муора пехотинеһа Дмитрий Егоровка позывнойа «Сунтар» уонна кини бойобуой доҕоро Николай Романовка позывнойа «Ронин» ананар. Кинилэр хорсун быһыылара, кэхтибэт санаалара бойобуой доҕордоһууга уонна Ийэ дойдуга бэриниилээх буолууга холобур буолар.
Кинигэ презентациятыгар аймах дьоно, герой чугас дьоно, муниципальнай улуустар баһылыктара, уопсастыбанньыктар кыттыыны ыллылар. Геройдар дьиэ кэргэттэрин уонна Аҕа дойдуну көмүскээччилэр хорсун быһыыларынан киэн туттааччылары холбуур олус суолталаах тэрээһин буолла.
«Пуонда филиала геройдар сырдык ааттарын үйэтитиигэ, Ийэ дойду көмүскэлигэр кылааттарын киллэрбит уонна хорсун быһыылары көрдөрбүттэри кэпсиир хайысхалаах көҕүлээһиннэри өйүүр», — диэтэ филиал салайааччыта Алексей Александров.
Кинигэ 100-тэн тахса страницалаах, хаартыскалардаах, тирааһа 1000 экземпляр.
Кинигэ төрүтүгэр олоҕуран, саас толору киэптээх киинэ устуута саҕаланыаҕа.
This post was published on 10.03.2025 14:07 14:07