Спорт кыһыҥҥы көрүҥнэригэр спорт оскуолатын иитиллээччилэрэ анал байыаннай дьайыы бэтэрээннэрэ Алексей Лупеевы уонна Егор Котельниковы кытта көрүстүлэр. Эр хоһуун уруога кэпсэтии киэбинэн ыытылынна. Бойобуой дьайыыга сылдьыбаттар оҕолорго фронт күннээҕи олоҕун, онно хайдах үлэлээбиттэрин, Россия байыаннайдарын геройдуу быһыыларын кэпсээтилэр. Ол туһунан регион салалтатын пресс-сулууспата суруйда.
Егор Котельников эр хоһуун уруогун бастакы ыытыыта. Кини эппитинэн, оҕолору кытта көрсүһүүттэн долгуйбут, ити эрээри кэпсэтии түмүгүнэн киэн туттубут.
«Олус эппиэтинэстээх көрсүһүү буолла. Сулууспам хайдах ааспытын кэпсээтим, оҕолор олус интэриэһинэй ыйытыылары биэрэллэр. Маннык уруоктар оҕону патриоттуу иитиигэ олус туһалаахтар диэн сыаналаатым», — диэтэ кини.
Егор СВО-тан кэлэн баран көхтөөхтүк спордунан дьарыктанар, кинини «Защитники Отечества» пуонда өйүүр. Спорт адаптивнай көрүҥнэригэр анал байыаннай дьайыы кыттыылаахтарыгар анаммыт «Кубок защитников Отечества» регионнааҕы физкультура тэрээһинигэр бастакы күрэхтэһиитэ буолбута. Егор остуол тенниһигэр уонна пауэрлифтиҥҥэ бириистээх миэстэлэри ылла, онон Уһук Илиҥҥи уокурук күрэхтэһиитигэр кыттар сүүмэрдэммит хамаанда састаабыгар киирдэ.
Эр хоһуун уруога эдэр спортсменнар санааларын көтөхтө.
This post was published on 28.01.2025 11:03 11:03