Оҕотун көрбөтөх ийэ дьыалатын туһунан «Эдэр саас» саайтыгар 2017 сыл ахсынньы 4 күнүгэр «Инбэлиит оҕотуттан арыгылыырын ордорбут» диэн иһитиннэриигэ суруйбуппут. Дьыала суукка көрүллүбүт.
Санатар буоллахха, бу дьыала Сунтаар улууһун борокуратуурата сокуоннай саастарын ситэ илик оҕолор бырааптарын уонна интэриэстэрин тутуһууну бэрэбиэркэлиир кэмигэр биллибитэ. 34 саастаах К. диэн дьахтар бэйэтин көрүнэр кыаҕа суох инбэлиит оҕотун үчүгэйдик көрбөтө-истибэтэ, сэтинньи ыйга оҕотун соҕотохтуу хаалларан, олох даҕаны үс күҥҥэ арыгылыы баран хаалбыта биллибитэ.
Социальнай үлэһиттэр оҕо аһыыр аһа да суоҕун, эмэ-томо, подгузниктара да ылыллыбаттарын бэрэбиэркэ кэмигэр быһаарбыттар. Оҕотун көрбөтүн иһин бу ийэ буолуохсут хаста даҕаны административнай эппиэккэ тардылла сылдьыбыт эрээри, долоҕойугар тиэрдибэтэх.
Ол иһин силиэстийэ уорганнара борокуратуура матырыйаалларыгар олоҕуран, РФ Холуобунай кодексатын 156-с ыстатыйатынан холуобунай дьыала тэрийбиттэрэ. Ол эбэтэр, төрөппүт оҕотун иитэр эбээһинэстэрин сөптөөхтүк толорботун иһин. Дььыаланы силиэстийэлээһин борокуратуура хонтуруолугар сылдьыбыта.
Бүгүн СӨ Борокуратууратын пресс-сулууспата иһитиннэрбитинэн, дьахтар силиэстийэ да кэмигэр, суут мунньаҕын да кэмигэр буруйун толору билиммит. Суут эппиэтинэһэ суох ийэни 160 чаас булгуччулаах үлэҕэ уурбут.
Эпиэкэ уорганнара оҕону ийэтиттэн ылан, ыарыытынан сибээстээн, Сунтаардааҕы киин балыыһаҕа оҕо салаатыгар киллэрбиттэр. Оттон ийэни төрөппүт быраабын хааччахтыыр туһунан ирдэбил-сайабылыанньа суукка көрүллээри сылдьар.
