Бу күннэргэ Аллыҥа нэһилиэгин баһылыга Николай Васильевич Спиридоновы көрсө түһэн, сайыҥҥы үлэ-хамнас туһунан кэпсэтэ түстүбүт.
Аллыҥа нэһилиэгэ билиҥҥитэ 700- тэн тахса ынах сүөһүлээх, 300- тэн тахса сылгылаах эбит. Билиҥҥи туругунан 57 ынах сиэмэлэммит. Кыстыы хаалар сүөһүнү кыстатарга 1350 тоннаны оттуур былааннаахтар, добуочча кур оттоохтор эбит. Бу күннэрдээҕи туругунан былаан туолуута 30-ча бырыһыаҥҥа чугаһаан эрэр. Николай Васильевич быйыл от үүнүүтэ, кырдьык, мөлтөх, ол да буоллар, дьон сөп буолар отторун булунуохтара, сүрэҕэлдьээбит эрэ киһи оттообот ини диир.
Нэһилиэк үүтү соҕотуопкалыыр былаана 355 т эбит, билиҥҥитэ 235 т үрүҥ илгэни туттарбыттар. Үүт былаана туоларыгар эрэл лаппа улахан. Нэһилиэккэ «Татыйыына» фирма 4 үлэһиттээх үүт сыаҕын үлэлэтэр. Үлэһиттэр хамнастарын ыйга иккитэ киһи мыымматын ылаллар эбит. Үүт туттарааччыларга ылар харчыларын суотугар ый аайы комбикорм, тарбыйахха иһэрдэргэ сухой үүт аҕалан биэрэллэрин аһара биһирииллэр.
Билиҥҥи Аллыҥа сайдар, киэркэйэр, улуус биир үчүгэй туруктаах нэһилиэгэ диэтэхпитинэ сыыспаппыт буолуо. Ол курдук нэһилиэккэ орто оскуола, успуорт саалата, култуурунай-сырдатар киин бары саҥа, аныгы технологиянан тутуллубут тутуулар. Бу сотору ФАП дьиэтэ тутуллан бүтэн үлэҕэ киирээри турар. Эһиил – 50 миэстэлээх оҕо саада.
Николай Васильевич кэпсээнин түмүгэр, ити тутууларбытын барыларын «Сунтарцеолит» тэрилтэ ыытар, онон кинилэргэ махталбыт улахан диир. Улуус улахан тэрилтэлэрин, ити «Сунтарцеолиты» уонна «Татыйыына» фирманы кытта партнердаһан үлэлиирбит биһиги сайдыыбыт биир төрүтэ буолар диэн улаханнык астынан бэлиэтиир.
