27 Тохсунньу 27.01
  • -48°
  • $ 73,82
  • 83,32

Суол кытыытыгар сылдьар сылгыга хайаан да сырдыгы тэйитэр бэлиэ кэтэрдиллиэхтээх диэн сурах олоҕо суох

14:07, 02 марта 2018
Текст:

Сылгыһыттарга саҥа суол быраабылата киирэрин туһунан иһитиннэрии батсаап ситимигэр бэҕэһээҥиттэн мэнээктиир. Саҥа быраабыланан, айан суолун кытыытыгар, нэһилиэнньэлээх пууннарга сылдьар сылгыларга моонньуларыгар хайаатар да сырдыгы тэйитэр анал бэлиэлэри кэтэрдии барыахтаах, ол суох буоллаҕына сылгыһыт ыстарааптаныахтаах диэбиттэр.


“Өскөтүн бу быраабыланы тутуспатахха суолга сылгыны үнтү көттөхтөрүнэ, сылгыһыт миэрэҕэ тардыллар, өссө улахан суумаҕа ыстарааптанар. Бу саҥа быраабыла кулун тутар 18 күнүттэн олоххо киириэҕэ. Бу туһунан РФ бырабыыталыстыбатын 1525 нүөмэрдээх 2017 с. ахсынньы 12 күнүнээҕи уурааҕар этиллэр”, — диэн иһитиннэриигэ суруйбуттар. Ити – сымыйа.

Бу маннык нүөмэрдээх уураах баар эрээри, ис хоһооно атын. Уураахха байыаннайдар уонна кинилэр дьиэ кэргэттэригэр сулууспаларын кэмигэр бэриллэр дьиэ-уот туһунан суруллар. РФ бырабыыталыстыбата таһаарбыт уураахтарын сайтарыгар http://government.ru  киирэн көрүөххүтүн сөп.

Оччотугар ити үөһэ этиллибит суол быраабылатыгар сыһыаннаах уураах хантан кэллэ? Кырдьык, атынан улахан айан суолугар таҕыстахха, сэрэхтээх буолуу ирдэниллэр. Ол эрээри бүтүн үөргэ барытыгар анал бэлиэлэри туруоруу туһунан быраабыла суох. Ити күн ахсынньы 12 күнүгэр “Суол быраабылатыгар уларытыылары киллэрии туһунан” диэн РФ бырабыыталыстыбатын 1524 нүөмэрдээх уурааҕа тахсыбыта. Онно сурулларынан, өскөтүн хараҥаҕа, туманнаахха айаннаан иһэр массыына умуллан хаалан суол ортотугар турарга күһэллэр буоллаҕына эбэтэр суол саахалыгар түбэстэххэ, суолга (суол кытыытыгар да сылдьар буоллахха), хайаатар да сырдыгы тэйитэр анал бэлиэлээх таҥаһы кэтиэхтээххин. Ааһан иһэр массыыналар ыраахтан көрөллөрүн курдук. Бу уураах бэчээккэ тахсыбытын кэннэ 90 хонугунан, ол эбэтэр кулун тутар 12 күнүттэн, күүһүгэр киирэр. Суолга сэрэхтээх буолуҥ.

0
0
27 января 27.01
  • -48°
  • $ 73,82
  • 83,32