24 Тохсунньу 24.01
  • -48°
  • $ 73,82
  • 83,32

Суол куһаҕаныттан улахан хаайтарыы таҕыста

12:04, 25 августа 2016
Текст:

Бу күннэргэ Дьокуускайтан Тааттаалаан испит айанньыттар федеральнай суолга улахан кыһалҕаны көрүстүлэр. Ол туһунан кинилэр Watnsapp нөҥүө тарҕаппыт суруктара өрөспүүбүлүкэни тилийэ көттө.


«Улахан хаайтарыыны таһаарбыт федеральнай суол учаастагар баран кэллибит. Килэмиэтир кэриҥэ кэрчиктээх сиргэ икки сиринэн массыына бөҕө хаайтарбыт. Бастакы сири «Дорожник” ХЭТ “Шантуй” бульдозера улахан массыыналары соһон таһаартаата, дьоҕус массыыналары бу үөһэ ааттаммыт тэрилтэ дуогабарынан үлэһитэ МТЗ тыраахтарынан соһон туораталаата. Ийэ буор кутуллубут сирэ ардах түһэн хойдон хаалан массыыналар көлүөһэлэригэр симиллэ сылдьар. Ону тэҥэ иккис харгыстаах сирбитигэр улахан омук фуралара буксуйаннар, бульдозербыт соһо кэлбитэ. Биир массыынаны соһон таһаарбытын кэннэ иккис массыынаны холбонон көнө сиргэ таһаарбытын кэннэ суоппар өссө кыратык сос диэбитин ылынан тракторист салҕыы состо. Ол эрээри суоппарбыт (Ытык Күөлгэ отопление турбатын тиэммит массыына) ручнигын араарбакка эрэ тартаран, суолтан сууллар, сууллубат гына кылы мүччү тохтоото. Онон эмиэ хаайтарыы үөскээтэ. Ол массыынаны хаалларан баран атын мэһэйдии турбут массыыналары сааһылаан дьоҕус массыыналар ааһалларыгар суол таһаардыбыт. Уазиктар этэҥҥэ ааһар буоллулар. Билигин суолга кутуллубут ийэ буору туора астартаран баран мантан түүн кыра массыыналар ааһалларыгар суол таһаара хааллылар. Улахан массыыналаахтар хонон баран сарсыарда сырдаабытын кэннэ сосуһуохпут, түүн хараҥаҕа куттала бэрт диэн сүбэлэстилэр.

Сарсын Теплай Ключтан Упдор “Колыма” ИТР-дара бэрибиэркэҕэ кэлиэхтэрэ, ону тэҥэ көрдөрөр-иһитиннэрэр хампаанньалар тиийиэхтэрэ.

Икки тыраахтар сменанан дьуһуурустубаҕа төһө да сырытталлар, тэрээһин үлэ мөлтөҕүн бэлиэтиэххэ наадалаах. Бастатан туран, «Дорожник” ХЭТ суолга регулировщиктары туруорбатаҕа улахан мэһэйи үөскэтэр эбит. Ол эбэтэр суолга буксуйбут массыыналары соһон ыраастыы сырыттахтарына утары массыыналар тоҕута анньан кэлэ тураллар, ол улахан мэһэйи үөскэттэ. Биир балаһаны ыраастаан баран иккиһи ыраастыыллара буоллар мэһэйдэр үөскүө суохтара эбит. Холобур, былырыын Хатылы-Кыйы суолун оҥороллоругар Магаданнар суолга куһаҕан учаастоктарга иккилии өттүгэр рациялаах дьону туруоралларын айаннаабыт дьон бэлиэтии көрбүккүт буолуо.

Иккиһинэн, бу курдук ардахтаах күһүн буоллаҕына, үгүс эрэйи көрсөбүт. Барыта аҕыс килэмиэтир суол учаастага оҥоһуллуохтааҕыттан үс гыммыттан биирэ эрэ оҥоһуллунна. Эрдэ кутуллубут ийэ буор туһата суох бадараан хааһы буолла.

Үсүһүнэн, хаайтаран турар суоппардар, кыра оҕолоох айанньыттар уонна суол үлэһиттэрин икки ардыларыгар сыһыан хоччохой. “Дорожник” ХЭТ күн сарсыҥҥыттан сөптөөх дьаһаллары ылара уолдьаста.

Федеральнай суолга балаһыанньаны Дьокуускай куораттан МЧС уонна да атын туһааннаах структуралар кэтээн көрө олороллор. Ыксаллаах быһыыны майгыны кэтээн көрөр сулууспалар, айан суолугар сэрэхтээх буолууну кэтээн көрөр салаалар быһаччы болҕомтоҕо ылан суһал дьаһаллары ылаллара хаһааҥҥытааҕар да наадалаах буолла. Дьон-сэргэ, айанньыттар маннык эрэйи көрбүттэрэ үһүс сууккалара туолла».

0
0
24 января 24.01
  • -48°
  • $ 73,82
  • 83,32