Сунтаар улууһун баһылыга Анатолий Григорьев тыа дьонугар саамай сүрүнэ сирбит-уоппут чөл буолуохтаах диэн санаанан салайтаран уонна кэлиҥҥи сылларга оттуур ходуһалар ууга былдьананнар мелиоративнай үлэҕэ сүрүн болҕомтотун туһаайан үлэ барар. Ол курдук, ааспыт сылтан мелиоратор штата арыллан, туох-ханнык үлэ барыахтааҕын көрөн-истэн, билигин Бордоҥ уонна Тэҥкэ нэһилиэктэрин кыраныыссаларыгар оспут хорууну хаһа сылдьаллар. Бу иннинэ баараҕай техника Элгээйи эҥэр үлэлээбитэ.
Бу күһүн миниистир Артем Александров уонна мелиорация салайааччыта Дмитрий Махаров сири-уоту көрөн, кырдьык улахан өйөбүл, көмө наадатын өйдөөн баараҕай тиэхиньикэ улуус көрүүтүгэр бэрилиннэ. 15 туонна ыйааһыннаах, бадарааҥҥа үлэлиир кыамталаах үлэһит техниканы Бүлүүттэн аҕаллылар.
Бордоҥ отчуттарыгар саамай улахан кыһалҕаны үөскэтэр Амыкаан уонна Бэттиэмэ сирдэрэ буолаллар. Бу күннэргэ управление специалистара уонна олохтоох дьон субуотунньук быһыытынан Амыкааҥҥа үлэни түмүктээн 1295 кв. миэтэрэ иэннээх, бүтүннүү ууга сытар Бэттиэмэ сиригэр үлэлиэхтэрэ, суруйда @suntaar_ulus
This post was published on 17.10.2025 10:29 10:29