14 От ыйа 14.07
  • 19°
  • $ 87,74
  • 95,76

Сунтаарга IT-форумҥа саҥа бырайыактар бигэргэннилэр

10:17, 17 сентября 2019
Текст:
Читайте нас на
Яндекс Новости
ЯДВ

Сунтаарга 153 кыттааччылаах «Вам вызов» диэн IT технологияҕа икки күннээх ыччат бастакы форума үрдүк таһымҥа ааста. Пуорумҥа ыаллыы Мииринэй улууһуттан 38 киһи, ону таһынан Дьокуускайтан, Хаҥаластан эксперт ыалдьыттар кытыннылар. Олус интэриэһинэйдик, дьоһуннаахтык ааста.


Сунтаарга буолбут IT технология форумугар 15 хамаанда тэриллэн, биэс хайысханан (доруобуйа, култуура, үөрэҕирии, промышленность, тыа хаһаайыстыбата) бырайыак оҥордулар. Араас эйгэттэн түмсүбүт ыччат тыҥааһыннаах, долгутуулаах иккис күҥҥэ бэлэмнээбит бырайыактарын Устье нэһилиэгэр дьүүлүүр сүбэ, экспердэр иннилэригэр көмүскээтилэр.

IT-форуму толкуйдаабыт Николай Павлович Александров, Сунтаар улууһун баһылыгын I солбуйааччы:

— Былырыын баччаларга биһиги Ил Дархаммыт Айсен Сергеевич Николаев улууспут баһылыга Анатолий Григорьевтыын өрөспүүбүлүкэҕэ аан маҥнайгы IT-паарканы үөрүүлээх түгэҥҥэ арыйбыттара. Бу саас IT технологияны күүскэ киллэрэр, ыччаты бу эйгэҕэ сыһыарар сыалтан форум ыытыахха диэн улуус баһылыгар этии киллэрбитим. Билигин үрдүк технология номнуо кимэн киирэн иһэр. Онон биһиги оҕолорбут, ыччаппыт техническэй, промышленнай салааларга күүскэ ылсан иһиэхтэрин наада. Салгыы сайдан, аан дойду таһымыгар да тахсалларыгар маннык тэрээһин төһүү буолуо диэн эрэнэбит. Маннык мустуулары салгыы сылын аайы ыытар былааннаахпыт, кэлэр сылга Бүлүү бөлөх улуустарын ыҥырыахпыт.

Трофим Алексеевич Иванов, улуустааҕы үөрэх управлениетын исписэлииһэ:

— Бу саас толкуйдаммыт, былааннаммыт сонун тэрээһиммит үрдүк таһымҥа табыллан ааста. Хамаандалар бары да күүстээхтэр. 15 хамаандаттан 5 кыайыылаах аатын сүгэн, 30-туу тыһ.солк.бириэмийэлэри туттулар. Сорох бырайыак отой ымпыгар-чымпыгар тиийэ оҥоһуллубута тэрэһин сыалын-соругун сиппитин туоһулуур диэххэ сөп.

Василий Егорович Дьячковскай, Хаҥаластан кэлбит ыалдьыт, форум тренер-модератора:

— Мин психология хайысхатыгар үлэлиибин, форум кыттааччыларыгар бырайыагы сөптөөхтүк оҥорорго, бэйэ презентациятын үчүгэйдик дьоҥҥо тириэрдиигэ, хас биирдии кыттааччыны кытта үлэ ыыттыбыт. Интэриэһинэй бырайыактар бааллар, онон улуус салалтата, тэрийэччилэр бастыҥ үлэлэри салгыы олоххо киллэрэн, туһаныахтара дии саныыбын. Бастакы тэрээһин Сунтаар кэрэ айылҕалаах пааркатыгар, Устьеҕа ыытыллыбыта тэрэһини ураты тыынныыр.

Дьулустаан Егоров, үөрэх управлениетын уопсай отдел исписэлииһэ, тэрийээччи, эксперт:

— IT технология хайысхатыгар улууспут бастакы долгутуулаах тэрээһинэ буолан, салайааччылартан саҕалаан «SUNAMP» эдэр педагогтар ассоциациялара, араас эйгэ исписэлиистэрэ бары түмсүүлэхтик күүскэ бэлэмнээн үлэлэстибит. Хамаандаларга араас эйгэ ыччата киирдэ. Онон бастыҥ, сэргэх бырайыактар бэлиэтэнэн, инникигэ туһаныллыахтара дии саныыбыт.

Ааптар: Юлия АЛЕКСЕЕВА, Сунтаар.

Следите за самым важным и интересным в Telegram-канале и WhatsApp-группе ЯСИА