Сунтаар улууһун Сунтаар сэлиэнньэтигэр кулун тутар 25 күнүгэр «Байҕал» бассейннаах спорт комплекса үлэтин саҕалаата. Эбийиэк тыа сирин биир кэлим сайыннарыы бырагырааманан «Современный облик сельских территорий» дьаһалынан тутулунна.
Бырабыыталыстыба бэрэссэдээтэлин солбуйааччы Сергей Местников эппитинэн, тыа сиригэр оҕо уонна улахан киһи доруобуйатын тупсарыыга анаан усулуобуйа тэриллэр. Маннык дьаһаллар уһун кыһыннаах сиргэ дьон олоҕун хаачыстыбатын тупсаралларын бэлиэтээтэ.
«Саамай сөптөөх быһаарыы. Тыа сирин олоҕо куорат эйгэтигэр чугаһыахтаах. Сөптөөх инфраструктура баар буолуохтаах— үөрэх, култуура, спорт эбийиэктэрэ. Сунтаар улууһугар спорт, физическай култуура сайдыаҕа, саҥа ааттар тахсыахтара — өрөспүүбүлүкэ уонна Россия таһымыгар», — диэтэ Сергей Местников.
2018 сылтан региоҥҥа биэс бөдөҥ спорт эбийиэгэ тутулунна.
This post was published on 26.03.2025 13:02 13:02