С.А. Зверев-Кыыл Уола төрөөбүтэ 125 сылыгар аналлаах бэлэмнэнии үлэлэрэ хайыы-сах саҕаланнылар диэн, «Сунтаар сонуннара» суруйар.
Ол курдук, 2024 с. Митрофан Мартынов- Бөөдөс Уола “Уол Дуолан Бухатыыр” олоҥхото улахан түһүлгэҕэ тураары бэлэмнэнэр. Бу күннэргэ өрөспүүбүлүкэҕэ бастыҥ олоҥхоҕо уһуйааччы, Олоҥхо тыйаатырын үлэһитэ Никандр Прокопьевич Тимофеев норуот талба талааннаахтарын мунньан үөрэх тэрийдэ.
Үөрэх сүрүн соругунан баараҕай туруорууга кыттар дьону сүүмэрдээһин буолла. Ону таһынан, кылыһаҕы арыйыыга, олоҥхо тэтимин тутарга уһуйда. Никандр Тимофеев үөрэҕин түмүктүүр түһүмэҕэр олоҥхоҕо үлэлэһэр дьон, саха тылын учууталларын олоҥхо тула санааларын иһиттэ, ырытыһыы, кэпсэтии оҥордо. Уһуйбут үөрэнээччилэрин олоҥхолорун иһитиннэрдэ.
Кини үөрэҕин салҕаан, дьону олоҥхоҕо дьарыктыырга, уһуйарга, С.А. Зверев-Кыыл Уолун аатынан киин фольклорга салаатын үлэһитэ Александра Яковлева уонна кини биир бастыҥ үөрэнээччитэ Айсен Федоров олоҥхоҕо ылсан үлэлиир кыахтаахтарын эттэ.
Мира Афанасьева, Сунтаар сонуннара
