И.Г.Спиридонов аатынан Кириэстээх оскуолатын успуорт саалатыгар мас тардыһыытыгар биирдиилээн бастыыр иһин улуус таһымнаах күрэхтэһии ыытылынна.
Манна улуус үгүс нэһилиэктэриттэн эдэр мадьынылар кэлэн кытыннылар. Бу турнир түмүгүнэн кыайыылаахтар кулун тутарга Дьокуускай куоракка улахан күрэхтэһиигэ кыттар хамаанда сүүмэрдэннэ. Күрэхтэһии үөрүүлээх аһыллыытыгар биир дойдулаахтарын, бу аҕыйах хонуктааҕыта ыытыллыбыт Н.Н.Тарскай аатынан көҥүл тустуу күрэхтэһиитин призерын Максимов Дениһы чиэстээһин буолла. Эдэр киһи успуорка ситиһиитин иһин нэһилиэк эр дьонун аатыттан харчынан бириэмийэни Кириэстээх орто оскуолатын дириэктэрэ Павел Васильев үөрүүлээх быһыыга-майгыга туттарда.
Манна даҕатан эттэххэ, Денис Кириэстээх оскуолатыгар орто сүһүөх кылааһы бүтэрбитэ. Ол кэннэ тустуунан дьарыгын сайыннара Сунтаардааҕы 3 №-дээх оскуолатыгар киирэн үөрэммитэ, А.И.Иванов аатынан олимпискай эрэллэри бэлэмниир спортивнай оскуолаҕа дьарыктаммыта.
Онтон Калининград куоракка баар олимпийскай эрэл училищены үөрэнэн бүтэрбитэ. Билигин ХИФУ физкультура уонна спорт институтугар 3 кууруска үөрэнэр.
Сарсыардаттан киэһэ хойукка диэри ыытыллыбыт күрэхтэһиигэ кыргыттар түөрт ыйааһыҥҥа кииристилэр. Ол курдук 50 кг ыйааһыҥҥа Кириэстээх оскуолатын үөрэнээччитэ Мартынова Настя, 55 киилэҕэ Түбэйтэн Илларионова Таисия, 60-ҥа эмиэ Түбэйтэн Чалбанова Жанна, 60-тан үөһэ ыйааһыннаахтарга Аллыҥа кыыһа Ксенофонтова Калерия чөмпүйүөннээтилэр.
2006-2007 сыллаах төрүөх уолаттар алта ыйааһыҥҥа мас тардыстылар. Түмүккэ Кириэстээх оскуолатын үөрэнээччитэ Макаринскай Николай 50 киилэҕэ, Түбэй эдэр мадьыныта Илларионов Марат, 60-ҥа Бордоҥ мадьыныта Удин Роберт, 65 киилэҕэ Тойбохой толуу уола Егоров Айдын,
70 киилэҕэ Кириэстээхтэн Максимов Максим, 70-тан үөһэ ыйааһыҥҥа
Аллыҥаттан Сидоров Юлиан бастакы миэстэлэри ыллылар.
Оттон 2008-2009 сыллаах төрүөх уолаттарга 40 киилэҕэ Христофоров Эрик, 45 киилэҕэ Илларионов Артем (уолаттар иккиэн түбэйдэр), 50 киилэлээх уолаттарга Прокопьев Дьулус, 55-кэ Лукин Никита (бордоҥнор), 60 киилэ ыйааһыҥҥа Маар Күөл эдэр мадьыныта Потапов Владимир, 65-тэн
үөһэ ыйааһыннаахтарга Кутана уола Иванов Николай бастаатылар.
Бу күннээҕи күрэхтэһиигэ араас күрэхтэһиилэргэ кыттан мас тардыһар оҕолордуун саҥа бэйэлэрин кыахтарын холонооччулар кытары кытыннылар. Онон күрэхтэһии үгүс көрөөччүлээх, “ыалдьаачччылаах” олус сытыытык, тыҥааһыннаахтык ыытылынна.
А.Афанасьев хаартыскаҕа түһэриилэрэ
»Сунтаар сонуннара» хаһыат
