Сунтаар улууһун олохтоохторун Удачнай­дааҕы хайаны байытар кэмби­нээк­кэ үлэлэтэргэ баһылык Григорьев этиилэри оҥорор

Сунтаар улууһун баһылыга Анатолий Григо­рьев уонна Дьарыктаах буолуу киинин дириэктэрэ Александр Николаев Мииринэй куоракка буол­бут олохтоох каадырдары быра­мыысыланнаска сыһыарыы, бэ­лэм­нээһин боппуруостарыгар мунньахха кыттан кэллилэр.

«Биһиги Мииринэй куоракка СӨ Бырабыы­талыстыбатын бэрэссэдээтэлин солбуйааччы Алексей Дьячковскай салайааччылаах улахан мунньахха баран кэллибит. «АЛРОСА» АХ бастакы вице-бэрэсидьиэнэ, толорооччу дириэктэрэ Игорь Соболев, Удачнайдааҕы хайаны байытар кэмбинээт дириэктэрэ Александр Махрачев, «Таас-Юрях Нефтегазодобыча» ХЭТ, Бүлүү бөлөх улуустарын баһылыктара, Дьарыктаах буолуу кииннэрин сала­йааччылара кыттыылаах олох­тоох каадыры бырамыысы­ланнаска сыһыарыыга кэпсэттибит. Билиҥҥи кэмҥэ бу саа­май тыын суолталаах боппуруос дии саныы­бын. Тоҕо диэтэххэ, биһиги эрэ улууска буолбакка, өрөс­пүүбүлүкэ үрдүнэн элбэх киһи үлэтэ суох сылдьар, бу тула улахан кэпсэтии буолла. Бары билэрбит курдук, Ил Дархан Егор Борисов 2018 сылы Дьарыктаах буолууну өйөөһүн сылынан бил­лэрэн улахан хамсааһыннар тахсан эрэллэр. Ааспыт сыл бүтүүтэ Егор Афана­сье­вич Саха сиригэр үлэлии сыл­дьар улахан тэрилтэлэри, улуус баһылыктарын ыҥыртаан бу боп­пуруоска киэҥ ыҥырыылаах мунньаҕы ыып­пыта. Онно хас биирдии тэ­рил­тэ хас киһини үлэҕэ ылыах­тааҕын, хас вакансия­лааҕын туһу­нан кэпсэтии буолбута, сыаллар-соруктар тур­буттара. Ол кэнниттэн бу буолбут мунньахха чопчу кэпсэ­тиилэр таҕыстылар. Ол курдук, Үөһээ Муунатааҕы сир баайдаах учаастактарга бу сыл үһүс кварталыттан 700-чэ үлэ миэс­тэтэ тахсыахтаах. Өссө биир сүрүн боппуруоһунан аҥаар­дас «АЛРОСА» АХ эрэ буолбакка, Саха сиригэр үлэлии сылдьар улахан тэрилтэлэргэ олохтоох каадырда­ры сыһыарыы буолла. Маны таһынан, олохтоох дьону үөрэтэр туһунан эмиэ кэпсэтии барда. МПТИ, Светлэйдээҕи индустриаль­най техникумҥа, «АЛРОСА» үөрэтэр кэмбинээ­тигэр үөрэт­тэрэр курдук кэпсэ­тиилэр бардылар. «АЛРОСА» кэмбинээтигэр үөрэнэр төлөбүрэ олус үрдүк, онон төлөбүрүн кыччатыахха диэн, урукку кэмҥэ «АЛРОСА» хампаан­ньаттан хам­нас­танан олорон олохтоох дьону үлэҕэ сыһыарар боломуочуйалаахтар бааллар этэ, ону сөргүтэн үлэлэтиэххэ наадатын туһунан этиилэри оҥорбуппун сэр­гээти­лэр», — диэн Анатолий Васи­льевич сырыытын туһунан кыл­гастык билиһиннэрдэ.

Былырыын күһүн ыытыллыбыт үлэ дьаарбаҥкатыгар Удачнай­дааҕы хайаны байытар кэмби­нээк­кэ 200-тэн тахса Сунтаар улууһун олохтоохторуттан сайаапка киирбититтэн 87-тэ көрүллүбүтэ. Анатолий Григорьев, Дьарыктаах буолуу киинин дириэктэрэ Александр Николаев сотору, СӨ Быра­быыталыстыбатын отчуотун кэннэ Удачнайдааҕы хайаны байытар кэмбинээт дириэктэрэ Александр Махрачевка тиийэн бу көрүллүбүт 87 сайаапканы кытта үлэлэһэн, дьону үлэҕэ ылар курдук кэпсэ­тиэхтэрэ.