Саха сирин олохтоохторо ПАО «ДЭК» тэрилтэтигэр 28 млрд. солк. иэстээх олороллор. Маны хонтуруоллуур уонна уот энергиятын кэмчилиир туһугар маннык хааччах киирбит диэн сыаналыахха сөп. Ол эрээри, атын альтернативата суох, күһэллии күүһүнэн уоту күүскэ туһанан олорор Сунтаар, Ньурба улуустара тоҕо мантан эмсэҕэлиэхтээхтэрий?
Сыананы быһар кэмитиэт тутаах үлэһиттэрин тылларын-өстөрүн иһиттэххэ, сөптөөх дьаһал тахсыбыт. Кинилэр этэллэринэн хас биирдии ыал дьиэтин сөпкө өрөмүөннээн, сылааһы куоттарыа суохтаах, маны тэҥэ оһоҕу оттон көмөлөһүннэрэргэ күһэйэллэр. Билигин биир массыына мас сыаната 25-30 тыһыынча солкуобайга тэҥнэһэр. Манна даҕатан эттэххэ, билиҥҥи үйэттэн уруккуга төннөн, оҺоҕу күүскэ оттон олорорбутугар тиийэбит. Маныаха оҺоҕу сатаан оттор кыаҕа суох соҕотох олорор кырдьаҕас, кыаммат, доруобуйаларыгар хааччахтаах дьон хайдах буоларый?
Чэпчэтиилээх тарыыбынан үстэн элбэх оҕолоох дьон толору туһанар. Маны тэҥэ, уот төлөбүрэ ыйдааҕы хамнастан 15% элбэх буоллаҕына, аадырыстаах көмөҕө сайабылыанньа биэриэххэ сөп. Биир өрүтүнэн нэһилиэнньэ ый ахсын 20-25 күннэргэ уот көрдөрүүтүн, хайаан да, биэриэн наада. Хайаан да хонтуораҕа тиийбэккэ, олус судургутук «ДЭК ЯКУТИЯ» о.д.а. сыһыарыыны хачайдаан, бу нөҥүө счетчик көрдөрүүтүн тиксэриэххэ сөп. Бу быраабыланы үөрүйэххэ кубулутан, биир да күнү көтүппэккэ төһө уот туһаныллыбытын отчуоттуур ордук.
Улуус дьаһалтата, депутаттар Сэбиэттэрэ бу боппуруоһу хаалларан кэбиспэккэ, нэһилиэнньэ туһугар, бу сокуон уларытыытыгар, диапазон хааччаҕын үрдэтиигэ салгыы үлэлиэҕэ. Билигин дьон аймалҕана, нэһилиэнньэ долгуйуута Дойду президенин дьаһалтатыгар тиийдэ. Онон сөптөөх быһаарыныы ылыныллыа диэн күүскэ эрэнэбит.
Сунтаар улууһун дьаһалтатын пресс-сулууспата.
Ааптар: Ньургуйаан Григорьева
This post was published on 22.01.2026 10:02 10:02