15 От ыйа 15.07
  • 18°
  • $ 87,74
  • 95,76

Сунтаар маастар-былаанын дьүүллэстилэр

Читайте нас на
Яндекс Новости
ЯДВ
«Партизан» култуура киинигэр Дьокуускай куораттан кэлбит архитектор-эксперт Ирина Алексеева, архитектор Дайаана Данилова уонна Елена Аммосова нэһилиэк олохтоохторун кытта Сунтаар нэһилиэгин маастар-былаанын туһунан дьүүллэстилэр, дьон санаатын, баҕатын иһиттилэр. Көрсүһүүнү Сунтаар нэһилиэгин баһылыга Эдуард Филиппов салайан ыытта.

Кылгас киирии тылы эппиттэрин кэннэ олохтоохтортон нэһилиэкпитин хайдах тупсарар туһунан бэйэлэрин санааларын эттилэр. Ол курдук Альбина Прокопьева өрүс биэрэгин бөҕөргөтүү үлэтэ хаһан барыай диэн ыйытта. Өрүс биэрэгэ сорох сиринэн сиҥнэ турарын бары билэбит. Манна үлэ барбатаҕына биэрэктэн чугас турар дьиэлэр сиҥнэр кутталлаахтар. Өссө сылаас автобус тохтобула тутуллуон наада диэн бэйэтин санаатын эттэ.

Сунтаардааҕы гимназия учуутала Августина Попова ыһыахтыыр сири – паарканы сыл устата үлэлэтэр наадатын туһунан эттэ. Оччоҕо дьон кэлэн дуоһуйа сынньаныа этэ. Онно сөптөөх усулуобуйаны тэрийэр наада. Суол кытыытыгар сатыы дьон сылдьар суол (дорожка) наадатын туһунан эттэ. Үлэ болуоссатын саҥардар үлэ барыахтааҕын ыйда.

Улуустааҕы үөрэҕирии түмэлин салайааччыта Альбина Иванова Дьокуускай куоракка дьүөрэлии «Эргэ Сунтаар» диэн эргэ дьиэлэр турар сирдэрин ааттыахха наада диэн этии киллэрдэ. Ону таһынан учууталлар, педагогтар аллеялара хайаан да оҥоһуллуохтаах. Онно улуус биллэр дьоно эмиэ киириэхтэрин сөп.

Александр Неустроев уулуссалар асфалланыахтарын туһунан эттэ. Ити үлэ сыл аайы барыахтаах. Оччотугар аны аҕыйах сылынан киин уулуссалар бары оҥоһуллан бүтүө этилэр диэтэ. Онтон Светлана Янкова анал байыаннай эпэрээссийэҕэ Сунтаар улууһуттан баран олохторун толук уурбут дьоммутугар аналлаах скверы оҥорор наадатын туһунан эттэ.

Кэпсэппит дьон баҕа санаалара мунньах боротокуолугар бэлиэтэнэн, олоххо киириэҕэр эрэниэҕиҥ.

Гаврил Андреев, Сунтаар сонуннара

Следите за самым важным и интересным в Telegram-канале и WhatsApp-группе ЯСИА
Тутаах тыллар