Маҕаннааҕы кылабыыһа сиригэр-уотугар мемориальнай комплекс тэриллиитэ СВО-ҕа өлбүт байыастар аймахтарын кытта сөбүлэһиннэриллибит. Комплекс өлбүт геройдар тустарынан өйдөбүлү харыстыырга көмөлөһүөҕэ. Бу туһунан ЯСИА комментарийыгар СВО бэтэрээннэрин Ассоциациятын бэрэссэдээтэлэ Сулустан Заболоцкай эттэ.
«Мемориальнай комплекс бырайыага өлбүт байыастар аймахтарын кытта сөбүлэһиннэриилээх ыытыллар. Байыастар тустарынан үйэтитэргэ комплекс наада диэн эппиттэрэ. Үгүстэр уҥуохтар тутуулара араас буоларын, сорохторугар плиталара, оннооҕор олбуордара суохтарын бэлиэтииллэр. Үлэ бүппүтүн кэннэ байыастар бары көмүүлэригэр пааматынньыктар, хаартыскалара баар буолуохтара. Биллэн турар, социальнай ситимнэргэ тарҕаммыт видеоҕа үлэ олус этичнайа суохтук көстүбүт эрээри, атыннык оҥоһуллубат. Мемориальнай комплекс дойдуларын туһугар тыыннарын биэрбит геройдар тустарынан өйдөбүлү харыстыырга көмөлөһүөҕэ», — диэн Сулустан Заблоцкай быһааран биэрдэ.
Эрдэ социальнай ситимнэргэ Маҕаннааҕы кылабыыһаҕа, СВО кэмигэр өлбүт байыаннайдар көмүллүбүт учаастактарыгар, грейдер үлэлиирин туһунан видео тарҕаммытын иһитиннэрбиппит. «Ритуал» муниципальнай бюджет тэрилтэтэ иһитиннэрбитинэн, онно мемориальнай эбийиэктэри тэрийиигэ сөбүлэһиннэриилээх үлэлэр ыытыллаллар.
This post was published on 08.09.2025 16:03 16:03