Ставропольга идэтийбит үөрэх тэрилтэлэрин ортолоругар XXXIII (IV) Бүтүн Россиятааҕы «Российская студенческая весна» бэстибээл түмүктэннэ. Бу сылга бэстибээл дойду 70 регионуттан 2 000-тан тахса талааннаах устудьуону түмтэ, «Саха» НКИХ.
Үнүстүрүмүөн хайысхатыгар Гран-при хаһаайынынан И.Е. Винокуров аатынан Нам педогогическай колледжын «Дьүрүһүй» хомусчуттар устудьуоннар ансаамбыллара буолла. «Народные инструменты» анал аакка II истиэпэннээх лауреатынан бу колледжтан «Өрөгөй» фольклорнай ансаамбыл, «Народное пение» анал аакка II истиэпэннээх лауреатынан – В.А. Вонгродскай аатынан Дьокуускайдааҕы медицинскэй колледж устудьуона Диана Яковлева буоллулар.
Өрөспүүбүлүкэ устудьуоннарын бэстибээлгэ ситиһиилээхтик кыттыбыттарынан Ил Дархан Айсен Николаев эҕэрдэлээтэ.
«Биһиги устудьуоннарбыт Саха сирин дьоһуннаахтык көрдөрдүлэр уонна үрдүк маастарыстыбаларын, талааннарын уонна үлэлэрин таһымын бигэргэттилэр. Биһиги оҕолорбутун дьоһуннаах кыайыыларынан эҕэрдэлиибин! Бу ситиһиилэр – педагогтар уонна настаабынньыктар дьулуурдаах үлэлэрин, дьиэ кэргэн өйөбүлүн уонна, биллэн турар, устудьуоннар бэйэлэрин улахан талааннарын түмүгэ. Инникитин өссө элбэх сырдык кыайыылар баар буоллуннар!», — диэн Айсен Николаев эттэ.
This post was published on 22.09.2025 18:22 18:22