Соторутааҕыта Үөһээ Дьааҥы улууһун Элгэһиттэн 1 атыыр соноҕоһу, Баачаан сылгы иитэр хаһаайыстыбаттан 11 убаһаны, атыылаһан аҕаллылар. Бу тымныыны тулуйар, кураан да сылларга үчүгэй туруктарын ыһыктыбат сылгы боруодата буолар. Станислав Вячеславович атыыласпыт «Баачаан» хаһаайыстыбатын сылгылара итинник боруодаҕа киирсэллэр. 2019 сыллаахха Арассыыйатааҕы Тыа хаһаайыстыбатын министиэристибэтин бирикээһинэн РФ племенной хаһаайыстыбаларын реестригэр киирбиттэрэ, Дьааҥы тииптээх сылгылары атыылаан тэнитэргэ көҥүл ылбыта. 2021 сылга Дьааҥы 31 племенной сылгытын атыылаабыттара.
«Биһиги эҥээргэ мэгэдьэк, приленскэй боруода сылгылары иитэбит. Сиэнчэр, булкаас боруода буолан, тымныыны аанньа тулуйбаттар, кулуннааһын даҕаны элбээтэ. Итинник кыһалҕаттан тахсаары, бу дьиҥнээх саха, Дьааҥы сылгыларын аҕаллыбыт, инникитин племенной хаһаайыстыба буолар баҕалаахпыт»,- диэн Станислав Вячеславович санаатын үллэстэр.
Станислав Сивцев 2004 сыллаахха дьиэ кэргэнинэн «Саргыдай» бааһынай хаһаайыстыбаны тэриммитэ, сылгы иитиитин хайысхатынан дьарыктаммыта. Чурапчы сэлиэнньэтиттэн арҕаа Куохара үрэҕэр сылгыны аһатар баазаны туттубуттара, тупсаран, кэҥэтэн испиттэрэ. Билигин хаһаайыстыба 97 сылгыны иитэн туруорар, 8 атыырдаахтар. Оттуур сирэ ити эҥээр 23 гектар бааһыналаахтар, эбиэһи ыһаллар. Инникитин элбэх сыллаах оту үүннэрэр былааннаахтар, сиэмэтин булбуттар. «Баачаан» хаһаайыстыбаны (дириэктэр Владимир Чириков) кытары «Племхолбоһук» нөҥүө сылгы атыылаһарга дуогабар түһэрсибиттэр. Сылгылар 4 суукка этэҥҥэ айаннаан, Чурапчыга кэллилэр.
Алексей Слепцов
