Федерация сэбиэтэ пленарнай мунньахха суһал сулууспаҕа сыл устата ыҥырыллар кыаҕы көрөр сокуону биһирээтэ. Ол туһунан ТАСС суруйар.
Саҥа киллэриилэр халандаарынай сыл устата медицина бэрэбиэркэтин ааһыыны, профессиональнай уонна психологическай сүүмэрдээһин ыытыытын уонна ыҥырыы хамыыһыйатын мунньахтарын хабар. Онуоха докумуоҥҥа призывниктары байыаннай сулууспаны ааһарга дьиҥнээхтик ыытыы сылга иккитэ — муус устар 1 күнүттэн от ыйын 15 күнүгэр диэри уонна алтынньы 1 күнүттэн ахсынньы 31 күнүгэр диэри ыытыллыа диэн ыйыллыбыт.
Ону тэҥэ сорох категориялаах гражданнарга байыаннай сулууспаҕа ыытыллар ураты болдьохтор олохтонуохтара. Чуолаан, хонуу үлэтинэн дьарыктанар тыа сирин олохтоохторо алтынньы 15 күнүттэн ахсынньы 31 күнүгэр диэри, үөрэх тэрилтэлэрин педагогическай үлэһиттэрэ ыам ыйын 1 күнүттэн от ыйын 15 күнүгэр диэри, оттон Уһук Хотугу сорох оройуоннарын олохтоохторо ыам ыйын 1 күнүттэн от ыйын 1 күнүгэр эбэтэр сэтинньи 1 күнүттэн ахсынньы 31 күнүгэр диэри сулууспалыы барыахтара.
Докумуонунан үлэлии турар сокуоҥҥа өссө хас да уларытыыны киллэрэллэр. Ол курдук, сокуон көрөрүнэн, электроннай бэбиэскэнэн военкомакка кэлии болдьоҕо реестрга туруоруллубут күнүттэн 30 күнтэн ордуо суоҕа. Маны таһынан ыҥырыы хамыыһыйата ыҥырыылаах киһи тус бэйэтэ кэлбэтэҕинэ даҕаны, болдьоҕу биэрэр эбэтэр ыҥырыыттан босхолуур эбэтэр байыаннай эбээһинэһи толорор туһунан быһаарыы ылынар кыахтанар, оттон военкоматтар байыаннай учуот реестриттэн, ол иһигэр электроннай киэбинэн гражданнарга куопуйалары биэрэр бырааптаах буолуохтара.
Саҥа киирии «ыҥырыылаах пууннарга ноҕуруусканы тэҥник тарҕатыахха уонна гражданнар байыаннай сулууспаҕа ыҥырыыларын хаачыстыбатын үрдэтиэххэ» диэн быһаарыы суругар бэлиэтэнэр.
РФ президенэ сокуоҥҥа илии баттыыр түбэлтэтигэр сыл устата ыҥырыыга сыһыаннаах нуормалар 2026 сыл тохсунньу 1 күнүттэн күүһүгэр киириэхтэрэ.
This post was published on 30.10.2025 11:35 11:35