Саха сиригэр анал байыаннай дьайыы (АБДь) кыттыылаахтара дьиэ кэргэн дохуотун аахсыбакка социальнай хантараак быһыытынан дьыалаларын арыйыыга судаарыстыбаннай өйөбүлү ылыахтарын сөп. Бу туһунан регион үлэ уонна социальнай сайдыы миниистирэ Елена Волкова кулун тутар 19 күнүгэр ыытыллыбыт брифиҥҥэ санатта.
«Букатын соторутааҕыта өрөспүүбүлүкэ бырабыыталыстыбатын саҥа нуорма быраап актата тахсыбыта, кини анал байыаннай дьайыы кыттыылаахтарыгар саҥа эбии кыахтары олохтуур соруктаах. Чуолаан, социальнай хантараакка олоҕуран демобилизацияламмыттарга үп-харчы өттүнэн көмөлөһөр кыах бэриллэр. Ол эрээри манна сүрүн уларыйыы маннык сайабылыанньалары билигин бу дьиэ кэргэн уонна АБДь бэтэрээннэрин дохуоттарын аахсыбакка көрүөхпүт. Ити биһиги уолаттарбытыгар үп- харчы өттүнэн өйөбүлү, кыаҕы үрдэтиэҕэ», — диэн Елена Волкова бэлиэтээтэ.
Социальнай хантараах оҥорторорго бэтэрээннэр бастаан «Защитники Отечества» пуонда филиалыгар рекомендация ылыахтаахтар. Ону тэҥэ «Мой бизнес» киинигэр бизнес-былаан толорууга босхо көмөлөһөллөр.
Социальнай хантараах үбэ тус сыаллаах буолар. Елена Волкова көмөнү ылааччылар дьарыктаах буолуу киинигэр учуокка туруохтаахтарын, ИП-ны оҥорторуохтаахтарын, ону тэҥэ бизнес-былаан уонна социальнай адаптация бырагырааматын дьаһалларын толоруохтаахтарын тоһоҕолоон бэлиэтээтэ.
Социальнай хантараах олоҕунан социальнай көмө-үлэ көрдүүр эбэтэр бэйэтин бизнеһин саҕалыан баҕалаахтарга ирдэнэр уонна тирэх дьаһал буолар. Бырагыраама Россия президенэ Владимир Путин көҕүлээбит «Дьиэ кэргэн» национальнай бырайыагын чэрчитинэн үлэлиир.
