Өрөбүллэргэ АО «Сахатранснефтегаз» регионнааҕы операторын үлэһиттэрэ Хаҥалас улууһун олохтоохторугар сүбэ-ама биэрдилэр уонна сайаапка хомуйдулар. Маны таһынан, сайаапканы эрдэ биэрбиттэр бэлэм дуогабарга илии баттастылар, диэн СИА-ҕа нефтегазовай хампаанньа пресс-сулууспата иһитиннэрэр.
— «Биһиги бырагыраама Саха сирин олохтоохторугар олус наадалааҕын көрөбүт. Хас биирдии киһи гаастааһын туһунан ыйытыытыгар толору эппиэти ыларын туһугуар «Сахатранснефтегаз» мобильнай офиһа эбии үлэлиирэ табыгастаах», – диэн сулууспа начальнига Николай Петухов кэпсээтэ.
Санатан эттэххэ, мобильнай офис кулун тутар 15 күнүгэр үлэҕэ киирбитэ. Нам, Чурапчы уонна Мэҥэ Хаҥалас улуустарыгар сырытта, Дьокуускай куорат Комсомольскай болуоссатыгар уонна куорат аттынааҕы Хатас, Марха бырамыысаланнай уокуруктарыгар сайаапкалары ылбыта. Мобильнай офиска барыта 324 сайаапка киирдэ.
