24 Олунньу 24.02
  • -38°
  • $ 92,75
  • 100,44

Соргулаах Солоҕоҥҥо олунньу 9-10 күннэригэр Ыччат десана үлэлээтэ

Хаартыска: Үлэ күүһэ хаһыат телеграм ханаала
Читайте нас на
Яндекс Новости
ЯДВ

«Зема» уонна «Оссо» тэрилтэлэрин ыччаттара хомуллан Солоҕоҥҥо «За нас, За победу!» диэн десанынан 25 буолан ыалдьыттаатылар.

Олус киэҥ бырагыраамалаах тэрээһин буолла.

Саха Өрөспүүбүлүкэтин ыччакка уонна социальнай коммуникацияларга миниистирэ Петр Шамаев оскуола оҕолорун, интернат иитиллээччилэрин кытта көрсүһүүтэ буолла.

Спортзалга хонон, дьыссаат минньигэс хааһытын аһыы охсон баран, уолаттар күөлгэ икки оҕо тэрилтэтигэр муус ыла киирдилэр. Кыргыттар норуот поэта С.И. Тарасов музейын сууйа, ханаппаакылыы хааллылар. Үлэ күөстүү оргуйда.

Бүтэ охсон «Ситим» сайдар эйгэтигэр мустан, нэһилиэккэ ыччат үлэтин хайдах көҕүлүөххэ сөбүй диэн ыйытыкка «мозговой штурм» буолла. Сүрдээх кэрэхсэбиллээх өйүктэр, этиилэр киирдилэр.

Ол кэнниттэн эбиэттии охсоот, спортсаалаҕа «Ыччат кубога» көрдөөх старт ыытылынна. Оскуола оҕолорун хамаандата кыайыы кубогын ылан үөрдэ.

Ол быыһыгар Петр Шамаев, биир устудьуон уонна улуус дьаһалтатын ыччат политикатыгар специалиһа Сардана Максимова олохтоох урбаанньыт ИП Прохоров Н.Е. көҕүлээһининэн тэриллибит түөлбэлэринэн «Алыптаах эйгэ» кыһыҥҥы оҕо сынньанар эйгэтин оҥорууга күрэҕи дьүүллүү бардылар.

Олус сөхтүлэр, махтайдылар. Тыҥааһыннаах мөккүөр кэнниттэн «Чараҥ» түөлбэ бастаан, 25 тыһ. солк уу харчынан ылары ситистэ, иккис «Саһарҕа» — 15 тыһ. солк., «Андылаах» — 10 тыһ. солк. ыланнар үөрүүлэрэ муҥура суох. Урбаан сылыгар Прохоров Николай Ефимович нэһилиэгин олохтоохторугар олус үчүгэй бэлэҕи оҥорбутун сыаналыыбыт, оҕолорбут хас түөлбэ аайы хойукка дылы оонньуур сирдэммиттэригэр махтанабыт.

Элбэх хайысхалаах культурнай-административнай кииҥҥэ Р.Я. Захарова аата иҥмитин кэрэһэлиир бэлиэ арыллыыта буолла. Манна 2014 сыллаахха уураах таһаарбыт ол кэмнээҕи нэһилиэк сэбиэтин депутата Степан Стручков, Раиса Захарова балта Розалия Семенова, улуус баһылыга Никита Андреев кыттыыны ыллылар.

Түмүккэ дойдуга Дьиэ кэргэн, Саха сиригэр Оҕо саас, улууска Урбаан уонна Солоҕоҥҥо Ыччат сылын арыйыы үөрүүлээх тэрээһинэ буолла. Бу киэһэ дьиэ кэргэн үөрүүтүнэн, оҕо-аймах саҥатынан, урбаанньыттар түҥэппит минньигэстэринэн, ыччат ырыатынан-үҥкүүтүнэн спортсаала иһэ томточчу туолла, үөрүү-көтүү, өрөгөй-талаан күүдэпчилэннэ.

Өссө даҕаны маннык киэһэлэр буола турдуннар Соргулаах Солоҕоммутугар!

Туругур, бигэ туруктаах дьиэ кэргэн, дьоллоох оҕо саас, күргүөмнээх урбаан эйгэтэ, эрчимнээх ыччат дьон!, суруйда @shologon_adm

Следите за самым важным и интересным в Telegram-канале и WhatsApp-группе ЯСИА