Санкт-Петербург куоракка «Традиции народов Якутии» I регионнар икки ардыларынааҕы бэстэбээл киэҥ далааһыннаахтык буолан ааста. Тэрээһини дойдубут култуурунай киинигэр олорор «Ахтылҕан» сахалар түмсүүлэрэ тэрийэн ыытта. Көрсүһүү Аан дойдуга Баҕа өттүнэн көмөлөөх буолуу, Арассыыйаҕа Норуоттар сомоҕолоһууларын, Саха Сиригэр Култуура сылларыгар, ону таһынан Төрөөбүт тыл уонна сурук-бичик күнүгэр ананан ыытылыннылар.
Тэрийээччилэр дьону түмэ тардар, саха баай култууратын киэҥ араҥаҕа билиһиннэрэр, регионнар икки ардыларыгар доҕордуу сыһыаны олохтуур, сомоҕолоһуу, баҕа өттүнэн көмө оҥоруу итиэннэ үтүө дьыала тула түмсүү кыаҕын көрдөрөр баҕа санаалара РФ Президенин иһинэн Саха сирин бэрэстэбиитэлистибэтин, Петербург Выборгскай оройуонун дьаһалтатын, «Дом национальностей», уонна үгүс общественнай түмсүүлэр өйөбүллэринэн олоххо киирдэ.
Бэстэбээлгэ 400 кэриҥэ киһи ыраахтан-чугастан кэлэн кытынна. Ол курдук Сахабыт сирин араас улуустарыттан: Тааттаттан, Уус-Алдантан, Чурапчыттан, Намтан, Хаҥаластан, Дьааҥыттан, Муоматтан, Бүлүүттэн ону таһынан Санкт-Петербургтан, Ленинградскай уобаластан, Архангельскай уобаластан, Чукотка кыраайыттан, Францияттан, онтон да атын регионнартан айар талааннаахтар кэлэн бэйэлэрин билиһиннэрдилэр, баай уопуттарын кытта үллэһиннилэр.
Тэрээһин биир сүрүн хайысхатынан фольклорга куонкурус ыытылынна. Онно саамай ыраахтан кэлэн кыттыбыт дьонунан Муома улууһуттан Соболоохтооҕу Норуот айымньытын дьиэтин «Долгураҥ» ансаамбыла буолла.
Ол курдук Норуот айымньытын дьиэтин дириэктэрэ Татьяна Степанова, методист Саргылана Леонтьева, Соболоох дьаһалтатын үлэһитэ Галина Соркомова уонна социальнай үлэһит Николай Корякин төрүт түөлбэлэрин фольклорун толордулар, дьон болҕомтотун тартылар, дириҥ биһирэбилин ыллылар.
Татьяна Гаврильевна билиһиннэрбитинэн, кинилэр үйэ аннараа өттүгэр олоро сылдьыбыт биир дойдулаахтарын чабырҕахтарын, айан хаалларбыт ырыаларын толордулар. Ону таһынан билигин олорор ытык кырдьаҕас, 95 саастаах Дария Ивановна Слепцова Муомалыы оһуокайын иһитиннэрдилэр.
Оттон Николай Корякин муомалар киэн туттар суруйааччылара, лингвист Николай Тарабукин туһунан ырыаны итиэннэ Евдокия Бокова суруйбут эбээн тылынан ырыатын дойдубут култуурунай киинин биир бастыҥ сценатыттан толордо.
Түмүккэ «Долгураҥ» ансаамбыл II-с истиэпэннээх Дипломант, оттон Николай I-кы истиэпэннээх Дипломантбуолары ситистилэр уонна Саха сирин норуоттарын култуураларын нэһилиэстибэлэрин харыстааһыҥҥа уонна тарҕатыыга уурар кылааттарын иһин 2026 сыл устата Москваҕа, Санкт-Петербурга, Казаньҥа, Калининградка, Улуу Новгородка, Хотугу Кавказка, Казахстаҥҥа, Киргизияҕа, Монголияҕа, Кытайга ыытыллар бэстэбээллэргэ кыттарга анал сертификат туттулар.
Ыраахтан кэлбит ыалдьыттарбыт бэстээбэлинэн эрэ муҥурдаммакка, РФ президенин иһинэн үлэлиир Саха Өрөспүүбүлүкэтин бэрэстэбиитэлистибэтин Петербургдааҕы салаатын салайааччыта Евгений Михайлович Петровтуун, биир дойдулаахтара — анал байыаннай дьайыы кыттыылааҕын уонна эмиэ биир дойдулаахтара, үйэтин тухары каадырабай булчутунан үлэлээбит, билигин манна олорор Егор Егорович Хабаровтыын, ону таһынан волонтер кыргыттардыын көрүстүлэр.
Улуус баһылыга Дмитрий Викторович Аммосов Махтал суруктарын, кинигэни, көмүс чаһыны, ону тэҥэ Муома улууһун баай, кэрэ айылҕатын матырыйаалларыттан оҥоһуктары, эмтээх отуттан кытыаны бэлэх ууннулар.
Өссө биир ураты сырыынан, олунньу 13 күнүгэр — саха тылын уонна суругун-бичигин күнүгэр Санкт-Петербург Смоленскай кылабыыһатыгар саха алпаабытын төрүттээччи, лингвист Семен Новгородов көмүс уҥуоҕар тиийэн сүгүрүйдүлэр, тыыннаах сибэкки дьөрбөтүн уурдулар уонна дойдуларын буоруттан бэристилэр.
Бу сырыыларын хоту кыраай ураты айар дьоҕурдаахтара, төрөөбүт төрүт түөлбэлэрин айымньыларын киэҥ араҥаҕа тарҕатааччылар тапталлаах Муомаларын улууһа тэриллибитэ 95-с сыллаах үбүлүөйүгэр анаатылар.
Түгэнинэн туһанан, бэстэбээл тэрийээччилэригэр, сырыыларын тухары ытыс үрдүгэр түһэрэн илдьэ сылдьыбыт СӨ Култууратын туйгуна, фольклорист, «Северный колорит» тэрилтэ салайааччыта Варвара Обоюковаҕа дириҥ махталларын тиэртилэр.
Анфиса Слепцова,
РФ суруналыыстарын Сойууһун чилиэнэ,
Санкт-Петербург к.
