18 Тохсунньу 18.01
  • -48°
  • $ 73,82
  • 83,32

Сирбит түҥэтиккэ барда

14:39, 02 февраля 2017
Текст:

Олунньу 1 күнүттэн “Уһук Илиҥҥи гектар” туһунан сокуон үһүс түһүмэҕэ саҕаланна. Онно олоҕуран Арассыыйа гражданина уокурук хайа баҕарар субъегар иллэҥ сиртэн биир га иэннээх учаастагы быстаран ылар бырааптанна. РФ Уһук Илини сайыннарыы миниистирэ Александр Галушка күн аҥаарыгар номнуо икки тыһыынча сайабылыанньа киирбитин өҥө туттан эттэ. Бу туһунан ССТА иһитиннэрбитин edersaas.ru ааҕыҥ.


Александр Галушка

Үрдүк сололоох чунуобунньук күн бастакы аҥаарыгар сайаапка киириитинэн инники күөҥҥэ Приморье (600 сайаапка), Хабаровскай (400-тэн тахса) уонна Саха сирэ, Курил арыылара (200-түү сайаапка) сылдьалларын бэлиэтээтэ. Итиэннэ, куоталаһыыны күөртээтэҕэ буолан, иннинээҕи түһүмэхтэргэ элбэх сайабылыанньалаах Саха сирин Хабаровскай кыраай биирдэ куотан бастакы миэстэҕэ тахсыбытын ыйда.

Сергей Качаев

Александр Галушка солбуйааччыта Сергей Качаев Интерфакска иһитиннэрбитинэн, Уһук Илиҥҥэ сир ыларга, сүрүннээн, Москва, Санкт-Петербург уонна Краснодар кыраайын олохтоохторо интэриэстээхтэрин биллэрэллэр эбит, Урал регионнарыттан эмиэ балачча баҕалаах баар үһү. Кини сайт нөҥүө сайабылыанньа толорбут дьон эдэрдэрин, орто саастара 25 – 34 буоларын ыйда.

Андрей Приданкин

Сокуон үһүс түһүмэҕин олоххо киллэриинэн, «НаДальнийВосток.рф» информация федеральнай ситимин ноҕурууската улаханнык улааппытын, сорох кэмҥэ сайтка 17 тыһыынчаҕа тиийэ киһи тэҥҥэ киирэрин Росреестр салайааччытын солбуйааччы Андрей Приданкин суруналыыстарга иһитиннэрдэ.

Мантан антах дойду үрдүнэн 12 тыһыынча Элбэх хайысхалаах киин үлэлиэҕэ диэн буолар. Киһи хапытаалын сайыннарыы агентствотын нөҥүө 20-тэн тахса тыһыынча үлэһит анал бэлэмнэниини ааспыт.

Юрий Трутнев

“Уһук Илиҥҥи гектар” сокуонун айбыт аҕата, РФ бырабыыталыстыбатын бэрэссэдээтэлин солбуйааччы, Уһук Илин уокурукка РФ бэрэсидьиэнин боломуочуйалаах бэрэстэбиитэлэ Юрий Трутнев баҕалаах дьону барыларын сирдиэхпит диэн Первэй ханаалга биэрбит интервьютугар этэн турар. Чунуобунньук Уһук Илиҥҥэ баар 610 мөлүйүөн гектартан 180-на түҥэтиккэ бэриллэрин ыйан туран, Арассыыйа хас биирдии олохтооҕун биир гектар сиринэн хааччыйар кыах баар диэн иһитиннэрдэ.

Санатар буоллахха, “босхо гектар” туһунан сокуон 2016 сыл ыам ыйыгар күүһүгэр киирбитэ.

2016 сыл бэс ыйыттан сир ылар быраап уокурук олохтоохторугар бэриллибитэ.

«НаДальнийВосток.рф» дааннайынан, 2017 сыл олунньу 1 күнүнээҕи туругунан,

сир ыларга 43 тыһыынчаттан тахса сайабылыанньа киирбит,

4 тыһыынча курдук киһи учаастагын быстаран ылбыт. 

Арассыыйа Уопсастыбаннай палаатата оҥорбут түмүгүнэн, Уһук Илиҥҥэ 2 мөлүйүөн киһи тыа хаһаайыстыбатынан дьарыктанарыгар сир баар, ону тэҥэ, 36 мөлүйүөн киһи ойуур учаастагын ылыан сөп.

Сир учаастага биэс сылга болдьохтоон босхо бэриллэр. Ол кэнниттэн сирдээх киһи учаастагын салгыы түүлэһиэн, биитэр бас билиигэ ылыан син. Өскөтө, сир аналынан туһаныллыбат буоллаҕына, судаарыстыбаҕа төннөрүллэр.

0
0
Тутаах тыллар
18 января 18.01
  • -48°
  • $ 73,82
  • 83,32