Балаҕан ыйын 9 күнүгэр Саха сирин киинэ тыйаатырдарыгар «Сураҕа суох…» диэн Улуу Кыайыы 76 сылыгар анаммыт киинэ дьон көрүүтүгэр тахсыа. «Охота и рыбалка в Якутии» телевизионнай биэрии бэлэмнээбит киинэтигэр бырайыак ааптара, бокуонньук, сибээс миниистиринэн, бырабыыталыстыба бэрэссэдээтэлин солбуйааччынан үлэлээбит Александр Борисов уһуллубута көстүө диэн, news.ykt.ru суруйар.
Киинэҕэ Аҕа дойду Улуу сэриитин кэмигэр сураҕа суох сүппүт саха саллаатын, булчутун туһунан кэпсэнэр. 18 сыл буолан баран кини кута төрөөбүт дойдутугар төннөр уонна манна төрөппүт уолуттан атын ким да хаалбатаҕын билэр.
Киинэ драматург, суруйааччы Семен Ермолаев — Сиэн Өкөр «Сураҕа суох сүппүт» пьесатынан уһуллубут. Киинэни өрөспүүбүлүкэ үтүөлээх артыыһа Валентина Чиркова режиссердаан устубут.
2017 сыллаахха устан саҕаламмыт киинэҕэ циркэ, тыйаатыр артыыстара, устудьуоннар, олохтоох нэһилиэнньэ, оҕолор уһуллубуттар.
Билигин «Охота и рыбалка в Якутии» бырайыагы Александр уола Илья Борисов салгыыр.
Киинэ Аҕа дойдуну көмүскэспит бары саллааттарга, сэрии хонуутугар охтубут буойуттарга, кинилэр ыччаттарыгар ананар.
This post was published on 06.09.2021 13:01 13:01