Ленскэй нэһилиэк дьаһалтатыттан олохтоох депутаттар сэбиэттэрин председателэ Егор Охлопков салайааччылаах дьоҕус биригээдэ оҕуруотчут Евдокия Гаврильева – Сибэкки Дуунньаҕа теплицатыгар көмөлөспүттэр.
Евдокия Степановна иһитиннэрбитинэн, буора тоҥмотун диэн оһоҕун кыһыны быһа хонтуруолга тутан оттубут. Сыыйа-баайа оттугу күүһүрдэн теплицатын 25 кыраадыска диэри сылыппыт, онон арассаадатын таһаарбыт.
Уолаттар кэлэннэр теплица үөһээҥи ирбит буорун аллараа түһэрбиттэр, алларааҥҥытын үөһээ таһаарбыттар. Онон буора тэҥнэспит. Билигин аҕыйах хонугунан оҕурсутун олордобун диир. Буорун температурата бүгүн 19 кыраадыс буолбут. Саамай табыгастаах усулуобуйаҕа чугаһаан эрэр.
Кулун тутар 5 күнүгэр 300-чэкэ угун олордор былааннаах. Оччотугар муус устарга оҕурсубун амсайыам этэ диир. Улахан уу кутар бааҕар оҕуруотчут Спиридон Шамаев уу сылытар оҥоро сылдьар. Кинилэр бэйэ-бэйэлэригэр хардарыта көмөлөсүһүү быһыытынан кэпсэтэн быйылгыттан ылсан үлэлээн эрэллэр эбит.
Онон Ленскэй нэһилиэк дьаһалтатыгар Евдокия Степановна бүгүн кэлэн көмөлөспүт уолаттарга улахан махталын тиэрдэр. Билигин киниэхэ саамай эппиэттээх кэмигэр кэлэн көмөлөспүттэрэ – бу улахан өйөбүл буоларын, үлэлииргэ да чэпчээбитин туһунан үөрүүтүн үллэстэн иһитиннэрдэ, суруйда @gazetaensieli
This post was published on 03.03.2026 11:03 11:03